rituale 11 baptis bayi bahasa toba

PANDIDION TU ANGKA DAKDANAK NA METMET

HATA PAMUNGKAAN

M. (Tu Ketua Dewan Stasi)

Amang, Ketua Dewan Stasi di Hurianta on,

Huria…….songon dia do pangidoan ni (angka) amanta dohot

inanta, na mamboan ianakhonnasida tu jolonta?

K. Pangidoannasida on do; asa dijalo ianakhonnasida tu Huria ni

Jesus Kristus marhite sian Pandidion.

M. Mauliate, alai metmet dope dakdanak on; ndang diantusi dope

na binahen ni Huria i. Asa: aha do sasintongna lapatan ni

Pandidion, na naeng lehononta tu (angka) na metmet on?

K. Marhite pandidion i dipaojak ma nasida di dalan hangoluan

na manongtong.

M. Songon i do tutu lapatan dohot tujuan ni ulaonta na badia on.

M. (tu Ama dohot Ina Serani)

Hamu, Ama dohot Ina Serani, hamu do songon utusan na

tumangkas sian Hurianta di ulaon Pandidion on; Olo do hamu

mangontoi jala mangaradoti (angka) dakdanak on, na naeng

gabe ruas ni Huria ni Tuhan marhite sian Pandidion on?

A/I.S. Olo do hami.

1

M. (Tu natoras ni dakdanak i)

Hamu amang dohot inang, las ni rohamuna uju tubu

anakhonmuna on tu hasiangan on; sadari on tamba do las ni

rohamuna ala boanon ni Tuhan i ibana (nasida) tu dalan

hangoluan. Alai ingot ma hamu: marhite

pardongansaripenmuna nunga ampe tu hamu na dua angka

tohonon na uli situtu, alai huhut borat, ima: manogunogu

ianakhonmuna asa gabe anak na hasea; marmudumuduhon

nasida asa hipas jala maju.

Dung tardidi ibana (nasida), tamba do ulaonmuna, Alana

ingkon ramotanmuna ibana di dalan hangoluan; ingkon

togihonmuna ibana tu Debata hombar tu angka aturan dohot

hasomalan ni Hurianta.

Dakdanak on do hamoraonmuna na umbalga: anak ni Debata,

na pinalua ni Kristus jala na niinganan ni Tondi Porbadia.

Hasungkun ma hamu saonari: Olo do hamu manogunogu

ianakhonmuna on di bagasan haporseaon Kristen, hombar tu

na niajarhon ni Barita Nauli na sian Tuhan i?

A/I. Olo do hami.

M. Olo do hamu denggan mangatur ngolu ni rumatanggamuna

asa sian hametmetonna nunga diguruhon dakdanak on disi

habonaron, hatigoran dohot holong?

2

A/I. Olo do hami.

M. Martangiang ma hita.

Ale Debata Ama, sai dipalas Ho do roha ni angka ama dohot

ina marhite sian hatutubu ni anak dohot boru. Tatap ma

nuaeng (angka) ama dohot ina, na pasahathon ianakhonna tu

pangarationmu, tu haluaon na pinatupa ni Anakmu Jesus

Kristus, tu panogunoguon ni Tondi Porbadia, dohot tu

panarihonon ni Huriami.

Urupi ma nasida manogunogu ianakhonna hombar tu lomo ni

roham; pasupasu ma halojaonnasida humophop ianakhonna;

bahen ma nasida marsada ni roha, anggiat di sandok

panogunoguonnasida tarida jala tarhilala holong no rohami,

bahen hatuaon ni (angka) dakdanak on. Maritehite Kristus

Tuhannami.

S. Amin.

MANANDAI DAKDANAK DOHOT SILANG

(Molo sanga tingki boi dijaha Mrk 10 : 13 – 16)

M. Hamu angka dongan, mangihuthon poda ni Barita Nauli tu

hita, Debata do mangarahon dakdanak on tu harajaonna;

Tuhanta i do manghaol ibana (nasida), mangampehon

tanganna laho mamasumasu ibana (nasida). Sude na i

3

dipasaut Debata do marhitehite hamu, natoras ni (angka)

dakdanak on, dohot marhitehite angka dongan na manarihon

ibana (nasida) mardongan holong, dohot marhitehite Huria i

na mamboan ibana (nasida) tu Kristus, na paluahon ibana

(nasida) marhitehite silangna. Dibahen i, tabahen ma saonari

tanda silang tu pardompahan ni (angka) dakdanak on.

M. Sai martua ma ho di bagasan hagogoon ni (†) silang ni Tuhan

i; sai didongani Tuhan i ma ho tongtong.

(Natoras dohot Ama/Ina serani mambahen tanda silang tu pardompahan ni

dakdanak i, huhut mandok:)

S. Sai didongani Tuhan i ma ho (†) tongtong.

M. Martangiang ma hita:

Ale Debata Ama, nunga hutandai hami ianakhonnami on

dohot silang ni Anakmi, ima tanda hadameon dohot haluaon.

Hupangido hami tu Ho: disi marroha (angka) dakdanak on sai

patorang ma tu ibana (nasida) lapatan dohot tujuan ni silang i,

anggiat margogo ibana (nasida) manaluhon hajahaton dohot

dosa marhitehite Anakmu, na pamonang hami saluhutna

marhitehite silangna na badia i ro di saleleng ni lelengna.

S. Amen.

4

MANGALEHON GOAR TU DAKDANAK

M. Hamu, amang dohot inang, marhite sian Pandidion dijanghon

do ianakhonmuna on gabe ruas ni bangso ni Debata; olat ni i

mangolu do ibana di bagasan hatopan ni Huria ni Jesus

Kristus. Songon dia do dipangido rohamuna naeng goaranta

ibana di bagasan pungun na badia i?

A. …………..(Ama i mangalusi jala paboahon goar i).

M. Antong, rap ma hita nuaeng mangido pasupasu ni Tuhan i di

(angka) dakdanak on; tu hita do dipasahat Debata ibana

(nasida), asa rap hita manogunogu ibana (nasida) tu na

denggan. Jongjong ma hita laos manurdukhon tangan tu

(angka) dakdanak sididion on.


Ale Debata, na manjaga, mangondingi jala manungkoli

saluhutna na adong, ramoti ma (angka) dakdanak on di

bagasan holongmu; padao ma sian ibana (nasida) haholomon

dohot hajahaton; bahen ma ibana (nasida) sogot gabe halak

na marroha, na umboto mambolongkon na jahat dohot

mamillit na denggan; pangolu ma haporseaonna jala

sondangkon ma hatiuron ni Bohim tu ibana (nasida), anggiat

tongtong marpos ni roha ibana (nasida) dipanogunoguonmu;

ungkap ma roha ni ibana (nasida) laho mananda dalanmu,

5

ima dalan hangoluan i; pargogoi ma ibana (nasida)

manaluhon na jahat marhite sian na denggan, jala gohi ma

ibana (nasida) dohot holongmi, asa gabe halak Kristen na

tang iabana (nasida), hombar tu Baritam Nauli i, bahen

sangap di Ho, ro di saleleng ni lelengna.

S. Amen.

MANGHATINDANGKON HAPORSEAON

M. Andorang so dijalo dope (angka) dakdanak on tu hatopan ni

Jesus Kristus, jumolo ma tahatindanghon haporseaonta, na

pasadahon hita saluhutna.

S. Ahu Porsea, …………..

M. Antong sude hita, lumobi hamu Amang dohot Inang, hamu

ma patorangkon muse tu dakdanakmuna on lapatan dohot

tujuan ni haporseaon na badia i, marhitehite hata, alai lumobi

marhitehite haburjuon dohot hatigoran, anggiat sian

pangalahomuna diguruhon ibana (nasida) habonaron dohot

hapantunon.

MANGALEHON PANDIDION

M. Lehon hamu ma saonari ianakhonmuna tu Ama/Ina Serani, na

naeng padidihon ibana tu Huria ni Jesus Kristus.

6

M. Ale ……………., ahu mandidi ho di bagasan Goar ni Ama

dohot (†) Anak dohot Tondi Porbadia.

(Tu ina i)

M. Jalo ma saonari anak/borumuna on naung niain ni Amanta

Debata gabe anak/borumuna; peop hamu ma sude hata i di

bagasan rohamuna, jala sai martua ma hamu tongtong din a

manarihon ripemuna.

(Miak Krisma)

M. Ale ………….. huampehon do tu ho goar ni Jesus Kristus;

humiahi do ho marhitehite Tondina, laos hutandai do ho

dohot (†) silangna, asa digohi ho dohot hagogoon nang dohot

parrohaon ni Tuhan i.

(Abit manang hain na bontar)

M. Hupajagar do ho dohot abit na patandahon asi ni roha

hadebataon; sai ias jala polin ma tongtong roham, pita songon

hain na saksak on.

(Lilin dilehon tu ama i)

7

M. Jesus Kristus na manondangi jabumuna; ibana ma

mangaramoti hamu na saripe di bagasan damena.

TANGIANG PARUJUNGAN

M. Martangiang ma hita.

Ale Ama na di surgo, Ho do mual dohot Labuan ni nasa

hangoluan; dijolu jala diarahon Ho do sude jolma tu

harajaonmu. Sai marhatuaon ma (angka) dakdanak on di tano

on; sai di bagasan dame ma ibana (nasida) tongtong, anggiat

saut sude lomo ni roham di ngoluna. Nunga dilehon Ho tu

ibana sipareon laho mananginangi, dohot simalolong laho

marnida; sai tinggil ma ibana (nasida) manangihon hata tua

na sian Ho i, jala sai ditatap ma parsaulianmu; pasupasu ma

simangidona dohot simanjojakna, anggiat dihilala ibana

(nasida) hinadenggan ni sude na tinompam. Jala dung sidung

pardalananna (nasida) di tano on hombar tu na sinangkap ni

roham, janghon ma ibana (nasida) tu hasonangan ni bagasmu;

sai disi ma hami sude marlas ni roha di bagasan Ho sahat ro

di saleleng ni lelengna.

S. Amen.

PASUPASU

8

M. Hamu angka dongan, mardame ma hamu mulak; sai Jesus

Kristus ma mandongani hamu laos mangingani jabumuna.

S. Amin.

PANDIDION TU NA MAGODANG

1. UPACARA PAMUNGKAAN

Ende Pamungkaan

(Rade ma angka na naeng tardidi rap dohot natorop di jolo ni Gereja. Dungi ro ma Malim manang Diakon na naeng mandidi nasida laho manomunomu).

Hata Pamungkaan

M. (†) Di bagasan goar ni Ama, dohot Anak dohot Tondi

Porbadia.

S. Amen.

M. Angka dongan na hinaholongan; Patut do hita marlas roha di

tingki on, alana apala di bagasan nuaeng ma ainon ni Tuhanta

i do (angka) donganta on asa gabe ruasna na imbaru. Rap ma

hita mantajanghon habasaon ni Tuanta dompak hita marhite

ulaon on, huhut tahatindanghon ma haluaon na pinatupana tu

hita be.

Panangkasion

M. ………….. (Manjouhon goar ni naeng tardidi)..

C. Nunga rade ahu! (Huhut marudur tu jolo).

9

M. Aha do dihirim rohamuna sian Huria ni Debata?

C. Haporseaon.

M. Aha do dihirim rohamuna sian haporseaon?

C. Hangoluan na tongtong.

M. Molo dihirim hamu hangoluan na tongtong ingkon

tandaonmu do Debata na sintong dohot Jesus Kristus na

sinuruna. Marhite haheheonna sian hamatean nunga

dipabangkit Debata Ibana gabe partogi tu hangoluan huhut

gabe Tuhan ni sandok hasiangan on. Nunga ditanda hamu

Kristus i laos masihol hamu naeng gabe siseanna; nunga

marusaha hamu mangaradoti podana jala tipak marparsaoran

raphon punguan na pinadimunna jala parsidohot di bagasan

ulaon partangianganna. Tutu do songon?

C. Olo, songon i do tutu.

M. (Manungkun tu Ama dohot Ina Serani)

Hamu do na ro tuson songon Ama dohot Ina Serani.

Hasungkun tu hamu: Boha do rohamu, nunga tama (angka)

dongan na dison manjalo pandidion?

A/I.S. Nunga tama, amang.

M. Rade do hamu mangurupi ibana (nasida) anon marhite

paniroion dohot tiruan na denggan, asa diihuthon ibana

(nasida) Kristus sian nasa rohana?

10

A/I.S. Rade do, amang.


Ale Amanami Nasunburju,

mandok mauliate do hami ala ni panogunoguonmu tu (angka)

dongan on. Nunga leleng sai dilulu ibana (nasida) Ho, laos

sadari on dialusi ibana (nasida) jaujoum di bagasan Huriam.

Sai hilalaonna ma paralealeon dohot Ho jala gabe parbarita ni

holongmu marhite Kristus Tuhannami.

S. Amen.

(Molo di jolo ni gareja dipamasa ulaon pamungkaan i, diudurhon ma muse nasida masuk tu gareja dohot natorop).

M. Saonari hujou hamu masuk tubagasan gereja, songon tanda

paboa naung dipasada hamu dirimu tu hatopan ni halak na

porsea.

2. PARHALADOON DI HATA NI DEBATA

Panjahaon 1

Ende

Panjahaon 2

Ende

Evangelium

Jamita

11

Tangiang Pangidoan/Hamubaon

M. Tatangiangkon ma (angka) dongan na naeng tardidi on nang

hita sude, asa anggiat lam burju jala lam muba rohanta, laos

tu toguna haporseaonta tu Kristus.

M. Sai tatanda ma hajahaton ni dosanta jala marsitutu hita

padengganhon parangenta.

Martangiang ma hita: ………

S. Tangihon ma Tuhan tangiangnami.

M. Sai gabe tanda na mangolu ma hita na manjujung asi dohot

holong ni Debata ai nunga dipalua Kristus hita marhite

pandidion. Martangiang ma hita: ………….


M. Sai tutu ma (angka) dongan na naeng tardidi on paimbaruhon

rohana, laho paradehon diri tu hasadaon dohot Kristus

Sipalua i. Martangiang ma hita: …………


M. Sai dapot ibana (nasida) ma hadameon din a mangihuthon

Kristus na manesa dosa ni portibi on.

Marhite ma hita: …………


12

M. Sai diurasi jala dipaias Tondi Porbadia i ma rohana (nasida)

laos digohi dohot parsaulian nang haiason na hushus.

Martangiang ma hita: …………….


M. Di bagasan pandidion on sai tartanom ma ibana (nasida)

raphon Kristus asa mate ibana (nasida) di dosa alai tongtong

mangolu di Debata. Martangiang ma hita: ……………….


M. Sai mian ma ibana (nasida) di bagasan bagas ni Ama i

songon anak na turut marroha, jala patuduhon tu dongan na

asing holong ni Debata na lambok i.

Martangiang ma hita: ……………….


M. Sai anggiat ma sude portibi on rap udur manopot bagas ni

Ama in a manghaholongi hita, ro din a sumeahon Anakna

laho paluahon hita. Martangiang ma hita: ………


M. Antong hamu dongan na naeng tardidi dohot sude hita, rap

ma hita patuduhon hamubaon ni rohanta jala martangiang ma

hita:

13

S. Ahu marhatopothon tu Debata Nasunhinagogo, nang tu hamu

pe ale angka dongan, paboa naung mardosa situtu do ahu,

marhite-hite pingkiran, hata, ulaon, dohot lan hahurangan.

Dibahen salanghu, salanghu, salanghu na umbalga.

Dibahen i, huelekelek Maria nabadia, na tongtong

nasohabubuhan, angka surusuruan dohot angka nabadia, nang

hamu pe ale angka dongan, asa ditangianghon hamu ahu tu

Tuhan Debatanta i.

(Manang diendehon: O Debata Parasiroha)

M. O Tuhan Debata Nasunhinagogo,

nunga disuru Ho Anakmu laho paluahon hami sian

parhatobanon ni dosa, laos mambahen hami gabe anakmu na

malua.

Hupangido hami, sai anggiat ma (angka) dongannami on

naung marhatopothon dosana di jolom, taitonmu sian

hagogoon ni hagolapon tubagasan hatiuronmu, siala ni

sitaonon dohot haheheon ni Kristus. Togutogu ma ibana

14

(nasida) saleleng pardalanan ni ngoluna asa hilalaonna

hinalambok ni holong dohot asim. Marhite Kristus

Tuhannami.

S. Amen.

M. Sai marasi ni roha ma Debata Nasunhinagogo i di hita, sai

disesa Ibana ma angka dosanta, jala ditogu-togu ma hita tu

hanguluan na tongtong.

S. Amen.

III. LITURGI PANDIDION

Pamasumasuaon ni aek

M. Hamu angka dongan, martangiang ma hita anggiat

dipasupasu Debata aek on, jala margogo (angka) donganta on

mangkajongjongkon haporseaonna.

M. Ale Debata Amanami Nasunburju, marhite aek pandidion on

nunga diusehon Ho ngolu na imbaru tubagasan ngolunami,

laos pabangkithon hami gabe anakmu.

S. Pinuji ma Debata ro di salelengna.

15

M. Nunga dipasada Ho sude jolma naung tardidi marhite aek

dohot Tondi Porbadia, gabe sada bangso di bagasan Anakmu

Jesus Kristus.


M. Nunga disesa Ho dosanami asa huhilala hami damemi, siala

ni Tondi haholongon na niusehonmu tubagasan rohanami.


M. Nunga dipilit Ho angka halak na tardidi, asa di bagasan las ni

roha baritahononnasida Barita Nauli ni Kristus tu sude

bangso.


(1. Molo so rade aek naung pinasupasu, on ma tangiangna:)

M. Ale Debata Amanami, nunga dijou Ho (angka) naposom tu

hututubu na imbaru asa di ibana (nasida) hangoluan na

saleleng ni lelengna. Sai marlomo ni roha ma Ho

mamasumasu (†) aek on, na naeng pangkeonnami mandidi

ibana (nasida) marhite Kristus Tuhannami.

S. Amen.

(2. Di tingki Paska, molo nunga rade aek naung pinasupasu, on ma tangiangna:)

16

M. Ale Amang, togihon ma (angka) naposom on tu hatutubu na

imbaru di bagasan Tondi Porbadia marhite aek pandidion

naung pinasupasu on. Ai nunga dijou Ho ibana (nasida) asa

mangulahi tubu di bagasan pandidion huhut dapotan

hangoluan na tongtong, marhite Kristus Tuhannami.

S. Amen.

Mansoadahon Sibolis

M. (Dung pamasumasuon ni aek, mandompakhon sididion)

Olo do hamu mangalo hajahaton na di bagasan dirimu nang

di tonga ni masyarakat?

C. Olo do ahu (hami)

M. Olo do hamu manulak pangelaelaon ni hasipelebeguon,

parjujion, parmabukhon nang haramunon?

C. Olo do ahu (hami).

M. Olo do hamu mangalo nasa ulaon dohot hasomalan na so

tingkos jala na so pintor, na mangalaosi hak dohot ugasan ni

jolma?

C. Olo do ahu (hami)

Manghatindangkon Haporseaon

M. Porsea do hamu di Debata Ama Nasunhinagogo, sitompa

langit dohot tano on?

17

C. Porsea do ahu (hami).

M. Porsea do hamu Jesus Kristus, Anakna na sasada i, Tuhanta,

na tinubuhon ni na so habubuhan Maria, na manaon na

porsuk, mate jala ditanom, naung hehe sian na mate, hundul

di siamun ni Debata Ama?

C. Porsea do ahu (hami)

M. Porsea do hamu di Tondi Porbadia, Huria Katolik Nabadia,

hatopan ni halak Nabadia, hasesaan ni dosa, haheheon ni

daging dohot hangoluan na manongtong?

C. Porsea do ahu (hami).

Pandidion

(Calon sididion ditiop Ama/Ina Serani)

M. Ale ……………… ahu mandidi hamu

di bagasan Goar ni Ama (manuangkon aek)

dohot Anak (manuangkon aek)

dohot Tondi Porbadia (manuangkon aek).

Ende

Mangalehon Miak Krisma

M. Hamu (angka) dongan na hinaholongan.

Debata, Ama ni Tuhan Jesus Kristus, nunga manubuhon

hamu muse sian aek dohot Tondi Porbadia, laos manesa sude

18

dosamu. Nunga dipabangkit hamu gabe anakna jala dipasada

tubagasan punguanna. Saonari miahan do hamu dohot miak

Krisma songon Kristus na miniakan ni Tondi Porbadia gabe

malim, panurirang nang raja.

(Mamiahi pardompahan ni na baru tardidi. Dung sae mamiahi didok ma:)

M. Sai diondingi Debata ma hamu asa gabe ruasna na burju

hamu sahat ro di na masuk tu hangoluan na so ra suda.

C. Amen.

Mangelehon Abit/Hain Na Bontar

M. Hamu dongan na hinaholongan, nunga gabe jolma na imbaru

hamu jala nunga disolukhon hamu Kristus i tu ngolumu. Jalo

ma hain na saksak on (dipasahat Ama/Ina Serani) na

patandahon ngolum naung ias badia. Jaga ma ngolumi unang

marlindang sahat ro di na mangodop tu jolo ni Tuhan,

panguhumta Jesus Kristus. Asa diloas hamu masuk tu

hangoluan na tongtong.

C. Amen.

Mangalehon Lilin

M. Pinangiho asa ro tu jolo Ama dohot Ina Serani laho pagalak

lilin, huhut pasahathonsa tu naung tardidi.

(Ama/Ina Serani ro tu jolo manggalahi lilin huhut mangalehon tu na baru tardidi).

19

M. Saonari nunga marsada hamu dohot Kristus, panondang ni

portibi on. Antong mangolu ma hamu songon anak hatiuron,

na mangulahon haporseaon na gomos, asa di haroro ni Tuhan,

tarbahen hamu manomunomu raphon sude angka Nabadia di

bagas ni Ama i di surgo.

C. Amen.

IV. LITURGI KRISMA

Ende

Hata Pamungkaan

M. Hamu (angka) dongan na baru tardidi, nunga mangulahi tubu

hamu di bagasan pandidion jala gabe ruas ni Pamatang ni

Kristus. Nuaeng, naeng jaloonmuna ma Tondi Porbadia, na

niusehon tu angka Apostel tingki Pentakosta. Marhite i, boi

ma hamu gabe ruas na matoras ni huria i, parsidohot na aktip

laho mambangun Pamatang ni Kristus, marhite na

mandalanhon ngolu haporseaon dohot haholongon.

Tangiang

M (Mandompakhon natorop huhut mangalompit tangan, mandok:)

Hamu angka dongan, martangiang ma hita tu Debata, Ama

Nasunhinagogo, asa suruonna Tondi Porbadia tu (angka)

dongan na baru tardidi on. Anggiat dipargogoi Tondi

20

Porbadia i nasida dohot silehonlehonna na marsinuksuk, jala

anggiat ma marhite miak Krisma on, gabe tudos ibana

(nasida) tu Kristus, Anak ni Debata. Antong hohom ma hita

tongkin martangiang di rohanta be. (Natorop hohom tongkin

martangiang di bagasan rohana be).

M. (Manurdukhon tangan dompak na baru tardidi)

Ale Debata Pargogo Nasohatudosan, Ama ni Tuhannami

Jesus Kristus. Nunga mangulahi ditubuhon Ho muse (angka)

naposom marhite aek dohot Tondi Porbadia, laos paluahon

ibana (nasida) sian dosa. Sai usehon ma Tondi Porbadia,

pangapul i tu ibana (nasida). Sai lehon ma tu ibana (nasida)

Tondi habisuhon dohot pangantusion, Tondi panuturion dohot

hagogoon, Tondi parbinotoan dohot haholongan tu Debata.

Jala sai gohi ma ibana (nasida) dohot Tondi na hot

marsihohot manomba Ho, marhite Kristus Tuhannami.

S. Amen.

(Sijalo Krisma ro tu jolo ni malim, Ama/Ina Serani mameakhon tangan siamun tu

abara ni si jalo Krisma, huhut manggoari goar ni calon i).

M. (Mamiahi pardompahan ni calon huhut mandok:)

Ale ……………., jalo ma tanda hagogoon ni Tondi Porbadia.

C. Amen.

M. Dame ni Kristus.

21

C. Amen.

ANGKA PANJAHON DI TINGKI PANDIDION

1. Padan Na Robi

a). Pmk 15 : 1 – 6, 18a

b). Pmk 17 : 1 – 8

c). Pmk 35 : 1 – 4, 6 – 7a

d). Pht 30 : 15 – 20

e). Jos 24 : 1 – 2a, 15 – 17

f). 2Raj 5 : 9 – 15a

2. Barita – Angka Surat

a). Bar 2 : 14a, 36 – 40a, 41 – 42

b). Rm 6 : 3 – 4, 8 – 11

c). 1Kor 12 : 12 – 13

3. Evangelium

a). Mat 16 : 24 – 27

b). Mat 28 : 18 – 20

c). Mrk 1 : 9 – 11

d). Mrk 10 : 13 – 16

e). Luk 24 : 44 – 53

f). Yoh 3 : 1 – 6

22

KATEKUMENAT DOHOT PANDIDION

OMBAS 1 : PANJALOON

Mangarade ma (angka) na naeng tardidi i rap dohot angka dongan na

manghangkungi ibana (nasida), i ma ama/ina serani, ketua Dewan Stasi/angka

sintua na digoari “panghangkung”.

1. Pamungkaan

M. Hamu (angka) dongan na hinaholongan, mardongan las ni

roha hujanghon hami hamu (na pungu dison, hamu angka)

asa gabe ruas ni Huria ni Tuhanta Jesus Kristus.

Diparsinta rohamu do, asa saluhut ngolu, na jinalomu sian

Debata pargogo Nasohatudosan i, diramoti jala dipauliuli

Tuhanta. Tarpatupa do i sude ala ni Jesus Kristus. Ala di

bagasan hajolmaon ni Jesus Kristus do dipatandahon Debata

Nasuntimbo i dirina.

Mangkuling do Debata tu hita marhite pamangan ni Jesus

Kristus; dipataridahon Debata do holong hatuaon i tu hita

marhitehite Jesus Kristus.

On do didok ni Jesus: “Na marnida ahu, na marnida Ama do”.

(Joh 14:9). Jala didok Ibana muse: “Ahu do panondang ni

portibi on. Na so tupa mardalan din a holom na mangihuthon

Ahu; di ibana do tahe Panondang hangoluan.” (Joh 8:12)

Dung i muse: Ahu do dalan i dohot hasintongan dohot

23

hangoluan. Ndang adong na sahat tu Ama i, ia so marhite sian

Ahu.” (Joh 14:6).

Dibahen i angka dongan na hinaholongan,

Martangiang ma hita:

Ale Debata Amanami tatap ma hami angka na masihol naeng

mananda Ho, ale Amang, dohot Anakmu Jesus Kristus, na

sinurum laho paluahon hami. Lehon ma tu hami panandaon

na imbaru; pargogoi ma hami marhite gogo na imbaru, jala

togu ma hami marhite pangajarion dohot tiruan ni Jesus

Kristus. Patiur ma pamingkirionnami jala patogu ma dohot

hagiot ni rohanami; pasabam ma rohanami asa tarbahen hami

sahat tu jolom. Ai holan Ho do na tuk mambahen ngolu na

gok, marhite Jesus Kristus na gabe dalan, hatigoran dohot

hangoluannami, nuaeng sahat ro di saleleng ni lelengna.

S. Amen.

2. Panjahaon

a). Joh 10 : 1 – 4, 11 – 16 (manang)

b). Hes 11 : 19 – 21

3. Ende

a). BETK no. 284 (manang)

b). BETK no. 288

24

4. Jamita na Jempek

5. Pendaftaran dohot Panjanghonon

M. Tu hamu angka panghangkung hupangido manjou angka goar

ni na naeng sijanghonon jala ganup ma nasida mangalusi

hombar tug oar na be: “nunga rade ahu”, i ma songon tanda

naung rade nasida janghonon gabe ruas ni Huria ni Kristus.

Dung dijaha angka goar i dipasahat ma daftar i tu malim.

Tu angka panghangkung:

M. Diboto hamu do, amang/inang, jala barani do hamu

manghatindangkon paboa na patut do halak on jaloon gabe

ruas ni Huria ni Jesus Kristus?

P. Mangihuthon parbinotoanhu, boi jala patut do halak on

janghononta.

M. Mauliate ma di Debata.

(didompakhon ma tu sijanghonon i)

M. Hamu na hinaholongan, saonari hupangido sian hamu di jolo

ni angka dongan na pungu dison tariashon hamuma

pangidoanmu sian ias ni rohamuna.

Aha do pinangido ni rohamuna?

C. Naeng gabe halak Kristen.

25

M. Aha alana umbahen naeng gabe halak Kristen hamu?

C. Ala porsea do ahu di Jesus Kristus.

M. Aha dilehon haporseaon i tu hamu?

C. Hangoluan na saleleng ni lelengna i.

M. Hangoluan na saleleng ni lelengna i ma mananda Debata na

mauliutus dohot suruanna Jesus Kristus. Na hehe do Ibana

mangarajai hangoluan dohot sude na adong, na tarida dohot

na so tarida.

Asa, molo naeng gabe sisean ni Kristus hamu, ingkon ajaran

ma hamu, asa ditanda hamu hatigoran na binoan ni Kristus.

Dungi muse ingkon marusaha do hamu gabe sisahaporseaon

jala sisaroha dohot ibana jala marpangalaho songon Kristus.

Jala naeng ma pangalahomuna hombar tu hata na nidok ni

Barita nauli. Saluhut aturan ni Debata marojahan do di patik

na dua on: Haholongi ma Tuhan Debatam sian nasa roham

jala haholongi ma donganmi doshon dirim.

6. Pasahathon Bibel

M. Hamu (angka) dongan na hinaholongan. Barita taringot tu

ulaon ni Tuhanta Jesus Kristus dohot hatigoran hadebataon na

paluahon hita, tarsurat do i di bagasan Bibel, lumobi di

26

bagasan Evangelium, Barita Nauli na pinatolhas ni Kristus tu

hita.

(Dijaha ma sada sian panjahaon on:)

a). Rom 1 : 2 – 4, 16 – 17

b). Rom 15 : 1 – 6

c). 2Tim 3 : 14 – 17

M. Hamu angka dongan. Jolma songon hita do panurat ni Buku

Nabadia i, i ma angka panurirang dohot angka apostel ni

Tuhanta na tinogutogu ni Tondi Porbadia sandiri.

Marhite Buku Nabadia i gabe boi tatanda Debata dohot

holong ni rohana di angka na pinillitna. Buku Nabadia i ma

songon ojahan ni ngolunta laho mangeahi haluaon. Dibahen i

mansai porlu do botoonmuna jala haporseamuna isi ni Buku

ni Tuhan i. Jadi mulai saonari naeng ajarhonon ma isina tu

hamu. Janghon hamu ma pangajarion i mardongan

haporseaon na gok las ni roha jala boto hamu ma: nunga

jumping tingki asi ni roha ni Debata nang tu hamu.

(Molo tarbahen dilehon ma Bibel tu (angka) calon i)


Ale Debata, Ama parasiroha, tatap ma (angka) dongan na

hinaholongan on, na marlomo ni roha paluaon ni Jesus

Kristus, jala na olo manjalo podam na badia i.

27

(dipaherbang malim i ma tanganna tu nasida)

M. Pasupasu ma sipareonna (nasida) tumangihon pangajarionmu

dohot angka patikmu.

S. Asi roham di hami.

M. Pasupasu ma simalolongna (nasida) asa boi manida

hamuliaon dohot hasangaponmu.


M. Pasupasu ma pamanganna (nasida) asa boi mangahatahon

hatigoran.


M. Pasupasu ma rohana (nasida) laho manghaporseai Ho.


(Malim mambahen tanda silang tu calon i jala ganup mambahen silang tu dirina

sandiri)

M. Pasupasu ma ibana (nasida) saluhutna asa tama marsada di

bagasan dohot (†) Ama dohot Anak dohot Tondi Porbadia.


M. Jala lehon ma tu ibana (nasida), ale Amang, tamba ni

habisuhon dohot hinadenggan ni parngoluon anggiat

dijanghon jala dihalomohon Ho ibana (nasida) muse.

7. Panutup

(tu angka panghangkung)

28

M. Hamu angka dongan na hinaholongan, nunga tajanghon

(angka) donganta on; saonari pasahatonhu ma ibana (nasida)

tu hamu, asa togutoguonmu jala ajaranmu ibana (nasida)

mangoloi Tuhanta dohot donganna jolma, asa ditanda ibana

(nasida) holong ni roha ni Debata, jala ditanda ibana (nasida)

silang ni Kristus na mamboan hatuaonta. Anggiat ma marhite

tanggungjawab na gok podaanmu ibana (nasida) mardongan

pangurupion ni Debata pargogo na so hatudosan, (†) Ama

dohot Anak dohot Tondi Porbadia.

S. Amen.

8. Ende Penutup

OMBAS II

MANSOADAHON SIBOLIS JALA MANODO KRISTUS

1. Pamungkaan

M. Hamu (angka) dongan na hinaholongan, paduahalihon ma

hita marpungu dison laho manjalo Sakramen Pandidion i, na

gabe hagogok ni ngolunta. Nunga pinatorang tu hamu

hatuaon na binoan ni Jesus Kristus, Anak ni Debata tu portibi

on di hita jolma. Na manaon na bernit do Ibana jala mate; na

dipahehe Debata Ibana sian hamtean jala gabe Tuhan jala

Raja Ibana. Nunga diboto hamu ise do Kristus i dohot Debata

29

Amana i dohot Tondi Porbadia. Saonari nunga boi tapastihon

sian ias ni rohanta marhite haporseaon manang naung rade do

hita mangoloi Kristus dohot Debata laho dapotan haluaon i.

Dijou Debata do hita alai sian lomo ni rohanta di ihuthononta

panjounna i. Dison ma boi janjihononta laho pahibul rohanta

dompak ngolu na naeng ro. Asa tau hita disi, tapangido ma

gogo dohot hatiuron ni Tondi Porbadia.


Ale Debata, suru ma Tondim Nabadia, asa dipaimbaru

ngolunami dohot portibi on. Lehon ma asa marhite hatiuron

ni Tondim Nabadia i dohot habisukonna, gabe marbisuk hami

jala marlas ni roha, marhite Kristus Tuhannami.

S. Amin.

2. Panjahon

Luk 11 : 14 – 23

3. Ende

BETK no. 293

4. Mansodahon dohot Pamisir Sibolis

M. Hamu angka dongan, nunga tabege sian hata ni Kristus

sandiri na mandok ndang haoloan hita na jahat rap dohot

Jesus Kristus. Na olo gabe sisean ni Kristus, ingkon padaohon

30

dirina sian sude na jahat jala ingkon aloonna sibolis. Holan

marhite pangurupion ni Debata do tarpatupa hita i.

Dibahen i martangiang ma hita:

Ale Debata Nasunbadia, mual jala guru ni sude habadiaon

dohot hatomanon, tangihon ma tangiangnami jala olio ma

pangidoannami on. Palua ma hami sian nasa na jahat. Sian

rimas dohot sogo ni roha dohot sian sude na jahat.

S. Palua ma hami, ale Tuhan.

M. Sian hagiot tu harorangan.


M. Sian late dohot sogo ni roha di dongan jolma.


M. Sian hageduhon, gabus, panipuon dohot pambahenan na

hurang tama.


M. Sian tois ni roha dohot halosohon.


M. Sian ginjang ni roha.


M. Sian hasalaan mangulahon pangkat dohot huaso,


M. Sian pos ni roha di angka utiutian,

31


M. Sian haporseaon na meoleol,


M. Sian sipaotooto ni sibolis,


M. Sian hamatean si saleleng ni lelengna,


M. Hamu (angka) dongan na hinaholongan, rap jongjong ma hita

jala alusi hamu ma sungkunsungkun on: Olo do hamu sian

nasa rohamu mangalo hajahaton di bagasan dirimu dohot sian

tongatonga ni parsaoran (masyarakat)?

C. Olo do ahu.

M. Soadahononmu do sibolis?

C. Soadahononku.

M. Dohot sude pambahenanna?

C. Soadahononku.

M. Dohot sude utiutianna?

C. Soadahononku.

M. Dibahen i, hamu angka dongan na hinaholongan, unang be

lehon hamu roham tu hajahaton i. Atik pen a jolo dipaholang

hamu dirimu sian Debata, laho mangoloi hagiotmuna sandiri;

atik pe marhite sian i dioloi hamu sibolis ulu ni angka dongan

32

na so si oloi Debata, naeng ma olat ni on sioloi Jesus Kristus

ma hamu. Unang be mangolu hita songon halak sipelebegu na

mangolu di haholomon. Naeng ma paubaonta roha dohot

pingkiranta. Dung gabe jolma na imbaru hita, marngolu na

imbaru ma hita mangihuthon Kristus, asa gabe pangoloi hita

di Debata. Unang be taarsahi Tondi Porbadia.

Ale raja ni haholomon padao ma dirim sian (angka) naposo ni

Tuhan on. Debata jala Tuhannami Jesus Kristus naung

manjou (angka) dongannami on tu mual ni asina, ima

Sakramen Pandidion. Sai unang ma barani ho mangaramuni

tanda silang ni Kristus, na naeng sibahenonnami tu

simanjujung ni (angka) dongannami on.

(Marudur ma tu jolo angka calon i, tinogu ni angka panghangkung. Dibahen

malim tanda silang tu simanjujungnasida. Dung salpu i dipaherbang malim

tanganna huhut mandok)


Ale Tuhan, Ama Nabadia, Debata Pargogo Nasohatudosan

jala sihabiaran, mula dohot mual ni nasa hatiuron

hasintongan, huelekelek hami ma asi ni roham laho di

(angka) dongan na hinaholongan on. Anggiat ma asa

surusuruanmu Nabadia i mangaramoti (angka) naposom di

33

saluhut pardalanan ni ngoluna huhut manogunogu ibana

(nasida) tu asi ni pandidion. Basabasahon ma hatiuronmu tu

ibana (nasida), asa tung haru ditanda Ho, ale Amang; paias

jala parbadiai ma ibana (nasida) jala pargogoi ma hagiotna

(sida) asa tongtong gabe naposom na daulat. Songon i ma

elekeleknami, marhitehite Tuhannami Jesus Kristus na rap

dohot Tondi Porbadia mangolu jala marhabangsa nuaeng

sahat ro di saleleng ni lelengna.

S. Amen.

5. Pamiahion

M. Hamu angka dongan na hinaholongan, Debata sandiri do na

mandok di bagasan Buku Nabadia, ia pangoluon ni jolma i, i

ma songon parngoluon ni angka soridadu. Marhite

pangurupion dohot basa ni Debata, ingkon bahenonta do

paraloan laho maniop haiason ni ngolu jala padaohon diri

maradophon hajahaton dohot dosa.

Dibahen i Debata mangalehon tu hita pingkiran dohot gogo;

ala ni i ingkon marsitutu jala marusaha dohot gomos hita, asa

marparange songon halak Kristen na daulat di portibi on.

Hahipason dohot hagogoon ni pamatang jotjot do

taparmudumudu marhite miak na marragamragam. Songon

tanda, paboa Debata muse naeng marmudumudu hahipason

34

dohot hagogoon ni roha nang tondinta, nunga dipasupasu huri

i miak on, gabe songon sada tudosan di asi ni Debata,

manjalo pamiahion marhite miak na badia on.

(Dimiahi malim tangan ni calon dohot miak katekumen, huhut mandok:)

M. Hupatogu ma hamu marhite miak haluaon on, asa tung gomos

jala huhut marlambas ni roha hamu masihohot di bagasan

Jesus Kristus.

6. Panodood (Pamilliton) Di Kristus

M. Hamu (angka) dongan na honaholongan, saonari husungkun

ma hamu:

Pillitonmuna do Kristus?

C. Pillitonku (nami).

M. Olo do hamu pasadahon dirimu tu Kristus jala huhut gabe

ruas ni Huriana?


M. Olo do hamu mangoloi jala sahat tu na mate mangihuthon

Kristus, Anak ni Debata, naung gabe jolma humophop hita?


M. Olo do hamu mangulahon sude patikna, lumobi patik holong

ni roha dompak Debata dohot dompak dongan jolma?


35

M. Olo do hamu songon Kristus.martoruk ni roha jala

marlambok ni roha?


M. Olo do hamu mangulahon hasintongan dohot hatigoran di

jolo ni angka dongan jolma jala mambahen tu nasida songon

na tu dirim sandiri?


M. Olo do hamu marusaha pamajuhon parngoluon hatopan jala

huhut ringgas markarejo laho padengganhon masyarakat na

tigor jala na martua?


M. Olo do hamu mangulahon tohonanmuna jala huhut mamorsan

sitaonon parngoluon songon Kristus?


7. Patuduhon Silang

M. Hamu angka dongan na hinaholongan. Jesus Kristus nunga

mamorsan boban ni parngoluonta. Laho padamehon hita

dohot Debata, ala naung tapalea habadiaonna marhite

dosanta; jala huhut laho paluahon hita sian hamatean na

saleleng ni lelengna, mate do Ibana di hau pinorsilang. Ibana

sandiri do mandok: “Manang ise na so mamorsan silangna

jala mangihuthon Ahu, ndang na tama i gabe siseanku.”

36

Naeng ma hamu (angka) dongan na hinaholongan di bagasan

panghirimon na gok, mamereng silang ni Kristus i do peak

haluaon, hangoluan dohot haheheonta. Naeng ma hamu

(angka) dongan na hinaholongan, di bagasan lambas ni roha

huhut mardongan pangurupion ni Debata, gabe pangihut ni

Kristus na marpangoloi jala raphon Ibana dapotan

hamonangan na saleleng ni lelengna.

8. Ende

BETK no 210 (Ida hau na sunbadia) manang

BETK no. 189 (mambahen tanda silang)

9. Panutup


Ale Debata pargogo Nasohatudosan, diparsinta roham do asa

sude jolma naeng malua marhitehite na gabe ruas ni Huriam.

Hupangido hami ma laho di angka na naeng tardidi on:

palambas jala patogu ma haporseaonnasida, pahinsa ma

rohanasida laho paimbaruhon ngolunasida; pasada ma nasida

rap dohot ruas naung pinillitmu marhite Sakramen Pandidion.

I do elekeleknami marhitehite Jesus Kristus, Anakmu jala

Tuhannami, ro di saleleng ni lelengna.

S. Amen.

37

M. Hamu (angka) dongan na hinaholongan, parade ma dirim

sadenggandengganna laho manjalo Sakramen Pandidion, jala

anggiat ma asa sude hamu dipasupasu Debata

Nasunhinagogo, Ama dohot (†) Anak dohot Tondi Porbadia.

S. Amen.

OMBAS III : PANDIDION

1. Pamungkaan (Ende Pandidion)

2. Hata Pamungkaan

M. Tingki na marhadohoan, tingki na marhatuaon nunga sahat tu

hamu (angka) dongan na hinaholongan. Mardongan las ni

roha dijalo punguan ni Debata hamu ala di ari on ma hamuna

naeng gabe ruas ni Kristus, dipasada dohot Ibana jala hehe

laho tu hangoluan na imbaru. Tondi Porbadia naung

manonggopi jala margogoihon Kristus, Ibana ma na naeng

margogoihon hamu muse. Dung i muse Kristus pasahathon

dirina tu hamu huhut naeng mangolu di bagasan hamu. Rap

dohot Kristus hamuna naeng jaloon ni Debata marhete sian

lomo ni rohana. Parhatopot hamu ma hasangaponmu jala jaga

ma hamu maradophon angka na naeng manegahonsa.


38

Ale Debata Amanami, tu hami nunga dilehon Ho tohonan

mandidihon jolma marhite aek dohot Tondi Porbadia.

Hupangido hami laho di (angka) dongannami naung rade

laho manjalo Pandidion na badia on: Anggiat ma Tondi

Porbadia manonggopi ibana (nasida) asa tama dijalo ibana

(nasida) di bagasan panguan Nabadia ni Debata jala boi

mangolu songon Kristus, bahen sangap di Ho, sahat ro di

saleleng ni lelengna.

S. Amen.

3. Panjahaon

Mat 3 : 13 – 17

4. Ende

BETK no. 284 : 3 – 4 (Tuhan i marmahan ahu)

5. Manghatindangkon Haporseaon

(Angka panghangkung mandompakhon malim i jala sada sian nasida mandok:)

P. Amang, donganta (nasida) na naeng tardidi, nunga dompak

nuaeng dison jala nunga manjalo Barita las ni roha haluaon i.

Pos do rohanami, ia ibana (nasida) nunga mangguruhon

dohot denggan Barita las ni roha ni Kristus i, jala mardongan

pangurupion ni Debata olo do ibana (nasida) mangulahonsa.

Hupangido hami tu hamu amang, asa paloas hamu ibana

39

(nasida) manghatindangkon haporseaon jala dijalo naeng

tardidi huhut bongot tu punguan na badia ni Kristus.

M. Mauliate! Jala mauliate hudok hami tu hamu (inang dohot hamu

angka amang) ala ni halojaonmu saleleng di tingki

pangaradeon. Hupangido hami tu hamu asa dijou hamu na

naeng tardidi mangadop tuson. …angka calon marudur tu jolo.

M. Dihaporseai hamu do Debata, Ama Pargogo Nasohatudosan,

sitompa langit dohot tano?

C. Huhaporseai (hami).

M. Dihaporseai hamu do Jesus Kristus, Anakna na sasadai,

Tuhanta, naung tubu, mate dohot hehe humophop hita?


M. Dihaporseai hamu do Tondi Porbadia, Huria Katolik Nabadia,

hatopan ni halak Nabadia, hasesaan ni dosa, haheheon ni

daging dohot hangoluan na saleleng ni lelengna?


M. Bahen hamu ma tanda silang.

C. Di bagasan goar ni Ama dohot Anak dohot Tondi Porbadia.

M. Dok ma saonari tangiang ni punguan ni Debata, i ma tangiang

na niajarhon ni Kristus.

C. Amanami, …

M. Olo do hamu tardidi?

40


6. Pamasumasuon ni Aek


Ale Debata Amanami Nasunburju, marhite aek pandidion on

nunga diusehon Ho ngolu na imbaru tu bagasan ngolunami,

laos pabangkithon hami gabe anakmu.


M. Nunga dipasada Ho sude jolma naung tardidi marhite aek

dohot Tondi Porbadia, gabe sada bangso di bagasan Anakmu

Jesus Kristus.


M. Nunga disesa Ho dosanami asa huhilala hami damemi, siala

ni Tondi haholongon na niusehonmi tubagasan rohanami.


M. Nunga dipilit Ho angka halak na tardidi, asa dibagasan las ni

roha baritahononnasida Barita Nauli ni Kristus tu sude

bangso.


(1. Molo so rade aek naung pinasupasu, on ma tangiangna):

M. Ale Debata Amanami, nunga dijou Ho (angka) naposomon tu

hatutubu na imbaru, asa di ibana marlomo ni roha ma Ho

41

mamasumasu (†) aek on, na naeng pangkeonnami mandidi

ibana (nasida) marhite Kristus Tuhannami.

S. Amen.

(2. Di tingki Paska, molo nunga rade aek naung pinasupasu, on ma tangiangna:)

M. Ale Amang, togihon ma (angka) naposom on tu hatutubu na

imbaru di bagasan Tondi Porbadia marhite aek Pandidion

naung pinasupasu on. Ai nunga dijou Ho ibana (nasida) asa

mangulahi tubu di bagasan Pandidion huhut dapotan

hangoluan na tongtong. Marhite Kristus Tuhannami.

S. Amen.

7. Pandidion

M. Ale ………………… ahu mandidi hamu di bagasan goar ni

Ama dohot (†) Anak dohot Tondi Porbadia.

8. Mangalehon Hain Na Bontar

M. Hamu (angka) dongan na hinaholongan, nunga gabe jolma na

imbaru hamu jala manolukhon Kristus tu ngolumu. Jalo ma

hain na saksak on (dipasahat Ama/Ina Serani) na patandahon

ngolum naung ias badia. Jaga ma ngolumi unang marlindang

sahat ro di na mangadop tu jolo ni Tuhan, Panguhumta Jesus

Kristus. Asa diloas hamu masuk tu hangoluan na tongtong.

S. Amen.

42

9. Mangalehon Lilin

M. Hamu (angka) dongan na hinaholongan, jalo ma lilin na galak

on, tudosan di Kristus naung hehe di bagasan hamuliaon.

Anggiat ma asa hata ni Kristus gabe songon palito na

manorangi dalan hangoluanmu. Jala anggiat ma marhite

tiruan ni ngolum gabe sinondang tu angka dongan na asing.

10. Krisma

M. Hamu angka dongan na hinaholongan, di bagasan Buku

Nabadia dibaritahon do pambahenan ni angka Apostel

mangampehon tanganna tu halak naung manjalo Pandidion na

badia i, gabe manjalo Tondi Nabadia ma nasida. Jala marhite

miak Krisma, naung pinasupasu jni Amanta Uskup, jala

naung gabe tudoson di hadodompak ni Tondi Porbadia, naeng

miahannami ma hamu, asa Tondi Porbadia manggohi hamu,

margogoihon asa tung tolap laho mandalanhon ngolu

hakristenon na tang jala situtu; asa boi hamu martanggung

jawab tu adopan ni Debata marhite pangalahomu; laho

mamboan sinondang ni Kristus tu portibi on dohot manjadi

sitindangi ni Kristus laho pabadiahon rumatangga; asa

parsidohot mambangun masyarakat na bonar, songon na

hinalomohon ni Debata, marhite haporseaon na hot, marhite

43

panghirimon na togu dohot marhite haholongon na barani

mansoadahon diri.

Jadi Tondi Porbadia i do patolaphon hamu gabe parsidohot

mamestahon Misa Nabadia, i ma Pelean hamuliateon na

mamboan haluaonta.

Jalo ma Sakramen on di bagasan haporseaon na gok.

(dipaherbang malim i tanganna:)


Ale Debata Pargogo Nasohatudosan jala na manontong,

naung mangalehon na imbaru tu (angka) dongannami on jala

naung mangelehon hasesaan ni saluhut angka dosana,

hupangido hami tu Ho: suru ma sian surgo Tondi Porbadia,

Pangapul, Tondi habisuhon dohot pangantusion, Tondi

panuturi dohot Tondi hagogoon, Tondi parbinotoan dohot

holong; gohi ma ibana (nasida) gabe sada dohot Kristus jala

asii ma ibana (nasida) sahat tu hangoluan na manongtong.

Alani Tuhannami Jesus Kristus, Anakmu na mangolu rap

dohot Ho jala marhasangapon di bagasan hasadaon dohot

Tondi porbadia, ro di saleleng ni lelengna.

S. Amen.

44

(Sijalo Krisma ro tu jolo ni malim, Ama/Ina Serani mameakhon tangan siamun tu

abara ni si jalo Krisma, huhut manggoari goar ni calon i. Mali mi mamiahi

pardompahan ni calon i huhut mandok:)

M. Ale ………………, jalo ma tanda hagogoon ni Tondi

Porbadia.

C. Amen.

M. Dame ni Kristus.

C. Amen.

MISA PANDIDION

Tangiang Pamungkaan

M. Ale Debata, dijou Ho do hami tu hangoluan marhitehite

Anakmu Jesus Kristus; ai mate do Ibana laho pangluhon

hami; nunga dirajumi Ho hami ruas ni Anakmu marhite sian

Pandidion.

Hupangido hami tu Ho; bahen ma hami tongtong mardongan

haporseaon dohot las ni roha minum sian mual hangoluan i,

di bagasan hagogoon ni Tondi Porbadia na mangolu raphon

Ho dohot Anakmi, ro di saleleng ni lelengna.

Epistel : 1Ptr 1 : 16 – 25

Evangelium : Mrk 10 : 13 – 16

45

Tangiang Offerterium

M. Ale Debata, sude angka naung tardidi di bagasan Goarmu

dijou Ho tu mejam na badia on: ai dison do diparade Ho di

bagasan tanda ni roti dohot anggur, naung hutaruhon hami,

sipanganon dohot siinumon sian surgo; hupangido hami tu

Ho: parmudumudu ma hami na tongtong masihaholongan

dohot masipaunean, anggiat tanda hami anak ni holongmu,

marhitehite Tuhannami Jesus, na mangolu ……..

Tangiang Panutup

M. Ale Debata, mauliate ma di Ho, ala nunga dibasabasahon Ho

hagogoonmu dohot holongmu tu hamu, angka naposom,

naung pinabangkitmi gabe anakmu marhite sian Pandidion.

Hupangido hami tu Ho: bahen ma hami marsahala ma imbaru

jala mangkangoluhon basabasami; ai i do mual na maboar di

bagasan hami sahat ro di hangoluan na manongtong,

marhitehite Anakmu Jesus Kristus.

S. Amen.

RUHUTRUHUT PANJANGHONON

GABE RUAS NI KATOLIK

1. Pamungkaan

46

Dung sidung ende pamungkaan, malim dohot pangurus Huria mandompkhon

natorop. Pangurus mandok tu malim i:

P. Amang Pastor dohot hamu sude dongan sahaporseaon. Dison

ro do nuaeng angka donganta naung leleng manghalungunhon

asa dijalo nasida tu hatopan ni Huria Katolik. Nasida i ma:

……………

Saonari dipangido nasida asa dijanghon nasida gabe dongan

sahaporsean na gok di bagasan Huria Katolik. Ala ni i,

Amang, tajanghon ma nasida gabe ruas ni Hurianta.

M. Denggan do; alai beha, nunga tangkas diboto hamu ia

parmasuk nasida tu Huria Katolik sian burju ni rohanasida?

P. Mangihuthon pangantusionku dohot pamerengku nunga

tangkas be be Amang!

M. Mauliate ma.

Tu angka calon i:

M. Hamu angka dongan na hinaholongan di bagasan Kristus.

Nunga dipataridahon hamu sihol ni rohamuna laho masuk tu

Huria Katolik. Disangkap rohamuna naeng ma hamu

mangolu songon halak Kristen jala pasangaphon Debata di

bagasan Huria Katolik. Tarlobi dihalungunhon hamu do asa

rap hita mamestahon Sakramen ni hasadaon, i ma Ekaristi

Nabadia. Ala ni i rap ma hita martangiang di punguanta on

47

anggiat disondangi jala disosoi Tondi Porbadia hamu nang

hami pe, asa tongtong hita mardalan di habonaron dohot

mangulahon lomo ni Debata.

2. Panopotion Hatopan

M. Angka dongan sasude. Di mula ni punguanta on porlu do hita

manopoti sala tu Debata nang tu danganta pe. Alana dosa na

maralohon holong ni roha, apala i do manegai hasadaon ni

roha ni halak Kristen. Saleleng ndang tutu dope

masihaholongan hita, hasisirang di bagasan Huria ndang

tarpasiding dope. Ala ni i tatimbangi ma di bagasan rohanta

be dosa naung hea taulahon. Tasolsoli ma angka dosanta

dohot hahuranganta mida Debata nang angka dongan pe ….

Saonari rap ma hita marhatopothon hasalaanta:

S. Ahu marhatopothon tu Debata …………

3. Panjahaon

Epistel : Eps 4 : 1 – 7, 13 – 21

Evangelium : Joh 17 : 1, 11 – 23

4. Panangkasion

Dung sidung jamita, pangurus Huria dijou tu jolo:

M. Pinangido tu angka pangurus ni Huria asa ro nasida tu jolo

songon utusan ni hurianta on, jala jongjong di siamun

sihambirang ni malim!

48

Tu angka calon na jongjong di jolo ni malim dohot angka pangurus:

M. Hamu angka dongan na naeng masuk cara resmi tu Huria i,

hamu nunga manjalo Sakramen Pandidion, alai dipangido

rohamuna asa manjadi ruas na tutu di bagasan Huria Katolik

raphon hami; ai nunga dihaporseai hamu do Debata Ama,

Anak dohot Tondi Porbadia i dohot sude poda ni Hurianta na

pasadahon hita saluhutna di bagasan Huria Katolik.

Laho patandahon sangkapmuna na uli on, alusi hamu ma

sungkunsungkunnami on:

M. Hamu angka dongan, olo do hamu pasahatohon dirimuna tu

panogunoguan ni Huria Katolik, na patolhashon tu hita Barita

Nauli sian Tuhanta Jesus Kristus?

C. Olo do hami.

M. Olo do hamu pasahathon dirimuna tu pangaramotion ni Huria

Katolik na mamboan tu hita haluaon na sian Tuhan i

marhitehite angka Sakramen na badia i?

C. Olo do hami.

M. Olo do hamu padomuhon dirimuna tu hatopan Nabadia i,

marojahan di parsadaan ni Ekaristi Nabadia, na pasadahon

hita saluhutna gabe sada badan?

C. Olo do hami.

49

M. Olo do hamu disi manjadi ruas na tutu, na naeng

masihaholongan jala masipauneunean dohot sude dongan,

hombar tu patik na sumurung di bagasan hakristenon?

C. Olo do hami.

M. Olo do hamu raphon hami sasudena patureturehon hurianta

on gabe tanda holong ni roha, tongtong rade mangurupi

angka dongan na di bagasan hagogotan dohot sitaonon?

C. Olo do hami.

5. Lilin na galak

M. Jalo ma saonari lilin na galak on songon tanda ni

haporseaonta jala parsadaanta dohot Kristus.

Lilin dibagi

M. Saonari hatindangkon hamu ma haporseaonta raphon sude

dongan Katolik na pungu dison.

Tu natorop

M. Hamu angka dongan sude, rap ma hita dohot angka donganta

on mangmanghatindangkon haporseaonta marhitehite

tangiang Haporseaon na 12 i.

6. Haporseaon na 12 i

S. Ahu porsea di Debata Ama Pargogo …….

7. Tangiang Panjaloon

50

M. Pinangido asa sude hita manurdukhon tangan siamun dompak

donganta na naeng sijaloonta on.


Ale Jesus Kristus, Tuhannami, Parmahan na sun denggan,

dihasiholi Ho do hasadaon ni sude birubirum naung

tinobusmi marhitehite mudar dohot hamamatem.

Suru ma Tondi Porbadia laho paimbaruhon ngolunami; palas

ma roha ni angka dongan na hujalo hami tubagasan Huriam,

asa mangihuthon lomo ni roham lam togu jala hot

parsaorannasida dohot Ho nang hami pe. Ho do na

mangarajai rap dohot Debata Ama di bagasan hasadaon ni

Tondi Porbadia sahat ro di saleleng ni lelengna.

S. Amen.

8. Panjanghonon

M. Hamu angka dongan na hinaholongan. Nunga dihatindakhon

hamu haporseaonmuna di jolo jala raphon sude dongan

Katolik na dison. Saonari hami, di bagasan goar ni Uskup

Agung Medan manjalo hamu gabe ruas resmi jala na tutu di

bagasan Huria Katolik. Mulai saonari, sainganan ma hamu

raphon hami, sai dipestahon hamu Ekaristi i do tanda ni

hasadaon, na pasadahon hita dohot Kristus.

Sai marhatuaon ma hamu di bagasan Huria Katolik!

51

9. Pasupasu

M. Hamu angka dongan na hinaholongan, jalo hamu ma

pasupasu sian Amanta Debata. Sai anggiat ma marsigorgor

jala marsinondang haporseaonta saleleng ngolumuna. Dungo

ma hamu. Marsidohot ma hamu di bagasan haporseaonta. Asa

dung jumping tingki i, i ma haroro ni Pangoli i, diboan hamu

masuk tu haroan bolon na saleleng ni lelengna.

M. Tuhan i mandongani hamu.

S. Nang hamu pe didongani Tuhan i

M. Debata Nasunhinagogo i ma mamasumasu hamu, Ama (†)

dohot Anak dohot Tondi Porbadia.

S. Amen.

SAKRAMEN HAMUBAON NI ROHA

PAMUNGKAAN

P. (Panopoti) Di bagasan goar ni Ama dohot Anak dohot Tondi

Porbadia. Amen.

M. Sai disondangi Debata ma rohamuna, asa tung denggan

panopotionmuna on.

P. Amen.

Molo Dokdanak :

52

M. Holong do roha ni Tuhan Jesus mida angka dakdanak. Na naeng

maringanan do Ibana di bagasan roham. Asa denggan ma topot

dosam.

P. Amen

PARHALADOON DI HATA NI DEBATA

M. Pahusorhusor hamu ma satongkin hata ni Buku Nabadia na

mandok: “Na ro do Anak ni jolma i mangalului jala paluahon

na mago. Umbalga do las ni roha di banuaginjang mida

sahalak pardosa na olo paubahon rohana, sian apala mida

siapulusia partigor, na so pola paubahon rohanasida.”

P. Mauliate ma di Debata.

PARHALADOON HAMUBAON NI ROHA

M. Nunga ditangkasi hamu be rohamuna jala nunga dipahehe

hamu roha solsol. Antong, topoti hamu ma saonari angka

dosamuna.

P. Ale Amang, anggo panopotion na parpudi , i ma ………..na

salpu.

On do dosangku……………

Husolsoli do sude dosangkon jala hupangido hasesaan ni dosa

i dohot penitensi na hombar tusi.

M. (Molo porlu dilehon ma sipasingot).

M. Hamu ni hinaholongan, saonari dok hamu ma tangiang

hamubaon ni roha di jolo ni Debata dohot di bagasan goar ni

53

Kristus, Sipalua hajolmaon, asa hulehon tu hamu hasesaan ni

dosa.

P. O Debata Parasiroha, husolsoli do dosangku, alani uhummu

na tama mangonai tu ahu, alai lumobi ala hupalea Ho,

sibahen na denggan na umbalga di ahu jala na sumurung

hinadengganmu.

Ahu manghagigihon dosangku dohot marbagabaga

mardongan pangurupi ni asim padengganhon parangengku

jala so mardosa be.

O Tuhan, asi roham di ahu pardosa on.

M. (Dung i dipaherbang malim i ma tanganna dompak simanjujung ni

panopoti i huhut ma didok:)

M. Nunga dipadame Debata Amanta pardengganbasa i portibi on

tu Dirina ala ni hamamate dohot haheheon ni Anakna. Nunga

diusehon Ibana Tondi Porbadia i bahen hasesaan ni dosa. Sai

dibasabasahon Ibana ma tu hamu marhite parhobason ni

Huriana hasesaan ni dosa dohot dame: Ahu paluahon hamu

sian sude dosamu di bagasan goar ni Ama dohot (†)Anak

dohot Tondi Porbadia.

P. Amen.

(manang lumobi tu dakdanak:)

M. Tuhanta Jesus Kristus do manesa sude dosam marhite sian

Huriana Nabadia i:

54

Ahu paluahon hamu sian sude di bagasan goar ni Ama dohot (†)

Anak dohot Tondi Porbadia.

P. Amen.

PANUTUP

M. Mauliate ma ni Debata ala ni denggan ni rohana.

P. Sahat ro di salelengna do asi ni rohana.

M. Nunga disesa Debata dosamuna. Mardame ma hita mulak.

P. Mauliate ma di Debata.

SAKARAMEN MIAK NABADIA

LAHO DI ANGKA NA MARSAHIT

TANGIANG PAMUNGKAAN

M. Dame ma di jabunta on;

S. Dohot di sude pangisina

Mamispis dohot aek na badia

M. Sai diurasi Debata ma hamu marhite nambur ni asina bahen

hangoluan na saleleng ni lelengna.

M. Goar ni Tuhan i mangurupi hita.

S. Ai Ibana manompa langit dohot tano.

M. Tuhan i mandongani hamu

55

S. Nang hamu pe didongani Tuhan i


Ale Jesus Kristus, Tuhannami, di bagasan goarmu do bongot

hami tu jabu on laho mangebati dongannami na marsahit on.

Basabasahon ma tu bagas on hatuaon dohot hagabeon sian

surgo, halalas ni roha na mamolin, haholongon na mangolu

dohot parhorasan na manongtong. Padao ma sian on nasa na

jahat dohot na gaor; sai mian ma dison hadameon dohot sada

ni roha; linggomi ma inganan on marhitehite hamuliaon ni

goarmu. Tatap ma hami na pungu dison laho manangiangkon

dongannami na marsahit on hombar tu ruhut ni Huriam;

dongani jala pasupasu ma ulaonnami on, huhut palumbang

laos pasonang ma roha ni dongannami na marsitaonon on. Ai

Ho do Nabadia jala Pardenggan basa, na tongtong mangolu

raphon Ama dohot Tondi Porbadia ro di saleleng ni lelengna.

S. Amen.

PANOPOTION NI DOSA

(Molo tarbahen, didasdasi malim i ma na marsahit i, asa disolsoli dosana)

Tangiang Hamubaon

S. Ale Debata Ama, Ho do na sunburju, na mangkaholongi hami

di bagasan Anakmu Jesus Kristus; Ho do na mangaramoti

56

hami di bagasan hasintongan dohot habadiaon marhitehite

Tondi Porbadia.

Husolsoli do sude pambahenanku na maralo tu sangkapmu na

sun dengan i; sesa ma nasa pangalahongku naung manundali

holong ni rohami. Paias jala papita ma ahu, ala ni sitaonon

dohot hamamate ni Anakmi; sai unang ma sirang ahu sian Ho


S. Amen.

M. Ahu paluahon hamu sian sude dosamuna di bagasan goar ni

Ama dohot (†) Anak dohot Tondi Porbadia.

S. Amen.

SAKRAMEN MIAK NABADIA

(Molo sanga tingki, dijaha ma Jak 5 : 14 – 16, laos ditambai dohot hata sipaingot

saotik).

M. Tatangiangkon ma saonari donganta na marsahit on:

M. Ale Debata ma, na manompa jolma tumiru rupam, sai

pasuang ma hagogoonmu di bagasan dongannami na

marsitaonon on.

S. Asi ma roham di ibana.

M. Ale Debata Ama, na maniop nasa na mangolu di tanganmu,

lehon ma tu dongannami on parhorasan hohot hahisaron.


57

M. Ale Debata Ama, na mangatur ngolu ni hajolmaon hombar tu

sangkap dohot holong ni roham, lehon ma habengeton dohot

sonang ni roha tu dongannami on.


M. Ale Jesus Kristus, na tongtong padomuhon roham tu lomo ni

roha ni Debata Ama, urupi ma dongannami on hombar tu na

sinangkap ni Ama i.


M. Ale Jesus Kristus, naung sahat tu hamuliaonmu sian dalan

hagaleon dohot sitaonon, pargogoi ma dongannami on

mamorsan silangna.


M. Ale Jesus Kristus, naung pasahathon Dirim gabe pelean

pardamean, paias ma dongannami on sian sude dosana.


M. Ale Tondi Porbadia, na sinuru laho pabadiahon hajolmaon,

miahi ma dongannami on marhitehite pangapulon dohot

halambohonmu.


M. Ale Tondi Porbadia, na manogihon hami tu saluhut

hasintongan, papatar ma tu dongannami on lapatan dohot

tujuan ni hasusaan dohot sitaonon.

58


M. Ale Tondi Porbadia, na manguduti ulaon ni Kristus di tano

on, gombarhon ma di bagasan ngolu ni dongannami on rupa

ni Jesus, naung marsitaonon jala naung monang.


Dimiahi malim pardompahan dohot tangan ni na marsahit i, huhut didok:

M. Marhite miak na badia on, sai diurup Tuhanta Nasunburju ma

hamu mardongan hagogoon ni Tondi Porbadia. Sai dipalua

Ibana ma hamu sian dosamuna; sai dipargogoi ma hamu di

bagasan sitaonon jala dilehon tu hamu haluaon.


Ale Tuhan, nunga huulahon hami ruhut na niadongkon ni

Huriam laho di dongan na marsahit. Dibahen i, hupangido

hami tu Ho: pataridahon ma tu dongannami on hatiuron ni

Bohim; papatar ma tu ibanan hagogoon ni tanganmu dohot

hinalambok ni asi ni roham, anggiat hot haporseaoona, hot

pos ni rohana jala bagas holong ni rohana di Ho, na mangatur

saluhutna bahen hatuaon ni hajolmaon.

S. Amen.

KOMMUNIO NABADIA

59

M. Jesus Kristus sandiri do ro saonari margogoiho hamu marhite

daging dohot Mudarna na sunbadia i. Alai andorang so tajolo

Dagingna, jumolo ma rap hita mandok tangiang na niajarhon

ni Tuhan i.

S. Amanami……..

M. Ida ma Anak Birubiru ni Debata, na mambuat dosa ni portibi

on. Martua ma angka na niarahon tu haroan ni Birubiru i.

S. Ale Tuhan, na so tama ahu manjanghon Ho; alai dok ma hata

si sandok sambaing, jadi ias ma ahu, naposomon.

M. Jalo ma Jesus Kristus, na gabe bohalmuna, na manjaga hamu

sian nasa na jahat jala manogunogu hamu tu hangoluan na

manongtong.

M. Pamatang ni Kristus.

S. Aman.


Ale Jesus Kristus, nunga dipargogoi Ho dongannami on

marhite daon parbanuaginjang. Ala ni i, pamalum ma ibana;

apuli jala palumbang ma rohana; pasada ma ibana tu Ho; sai

mian ma Ho di bagasan ibana, anggiat hiras jala marlas ni

roha ibana tongtong pasauthon nasa lomo ni roham, bahen

sangap di Ho, bahen hatuaon di ibana ro di saleleng ni

lelengna.

60

PASUPASU

M. Sai mian ma di lambungmuna Tuhanta Jesus Kristus i; sai

siondingi Ibana ma hamu; sai diramoti jala diiringiring ma

hamu; sai Ibana ma di jolomuna dohot di pudimuna, laho

manjaga hamu; sai Ibana ma di atasmuna laho (†)

mamasumasu hamu. Ai Ibana do Tuhan na mangolu jala na

mangarajai raphon Ama dohot Tondi Porbadia ro di saleleng

ni lelengna.

S. Amen.

ATURAN MANANOM NA MATE

1. DI JABU

- Lilin dipagalak

1. Pamungkaan

M. Tapungka ma ulaonta on.

S. Di bagasan goar ni Ama dohot Anak dohot Tondi Porbadia.

Amen.

- Ende Pamungkaan: 1 ayat

M. Hamu angka dongan, marpungu do hita dison, laho

manghormati dohot manangiangkon donganta si

…………………. naung monding on. Songon i do diajarhon

adatta dohot ungamonta tu hita. Antong, taulahon ma i

61

mardongan holong ni roha. Laho sirang sian donganta on,

tapasahat ma ibana tu Amanta Debata. Ai mangolu pe hita,

mangolu di Tuhan i do, jala mate pe hita, mate di Tuhan i do.

Asa tatangiangkon ma donganta on, anggiat dijanghon

Debata ibana laho manghalashon hatuaon na manongtong i.

Didok apostel Paulus do: “Molo naung mate hita rap dohot

Kristus, dihaporseai rohanta rap mangolu ma hita dohot

Ibana.

Ai taboto do:

na so mate be Kristus dung mulak mangolu sian na mate.

Ndang dirajai hamatean i be Ibana”.

- Ende Pamungkaan: diuduti

M. Ale Tuhan, tangihon ma tangiangnami.

S. Jala sai sahat ma tu Ho joujounami.


Ale Debata, janghon ma dongannami si ………….. on tu

lambungmu. Nunga dijou Ho ibana sian portibi on. Palua ma

ibana sian rante ni dosana, basabasahon ma tu ibana hatuaon

dohot hatiuron na manongtong. Parade ma inganana di

tongtonga ni angka Nabadia, jala pahehe ma ibana tu

hamuliaon ni haheheonmu, marhite Kristus Tuhannami.

S. Amin.

62

2. Ulaon Pangapulon

(Molo porlu bagian on boi ditinggalhon)

M. Tatangihon ma hata ni Debata songon na tarsurat di Buku

Andung (3 : 17 – 26).

Nunga dipaholang Tuhan rohangku sian hadameon, gabe lupa

ahu di na denggan. Jadi ningku ma: nunga tung mago be

nalom dohot arop ni rohangku di Tuhan i. Sai huingot do

dongolhu dohot pangaleleon na tu ahu. Sai huingotingot ma i

tutu, asa tung sabam rohangku di bagasan. I ma antong

parateatehonongku; ala ni i do umbahen marpanghirimon

ahu. Asiasi ni Tuhan sambaing do umbahen na so rap siap

ahu, ai ndang mansohot asi ni rohana i. Mulak rata do tahe

ganup sogot; godang ma tutu habonaranmu, ale Tuhan. Tuhan

i do jambarhu, ninna rohangku. Dibahen i marhaporusan tu

ibana ma ahu. Pardenggan basa do Tuhan mida angka na

marhaposan tu ibana, mida tondi ni angka na mangalului

ibana. Martua ma manang ise na hohom mangkalungunhon

hatuaon ni Tuhan i.

Songon i ma dipangkulingi Debata hita sadari on.

S. Mauliate ma di Debata

Molo adong do pe angka dongan na naeng pasahathon hata apulapul manang hata

togartogar tu sisolhot ni naung monding i, dilehon ma tingki saonari. (Laos jumolo

63

ma mandok hata angka tondong dohot aleale na so Katolik, dung pe i asa ditutup

Huria. Mamereng keadaan, denggan do dipaloas nasida manjaha manang piga

ayat ni Buku Nabadia, huhut mamboan ende nasida, ai tamuenta do nasida di

ulaon parhuriaon).


Ale Debata. Ho do hatuaon di angka na porsea, Ho do na

manobus hami, marhite sian hamamate dohot haheheon ni

Anakmu. Nunga dihaporseai naposom si …………………..

on hahomion ni haheheon i. Sai asi ma roham mangalehon tu

ibana hatuaon na manongtong i. Marhite Kristus Tuhannami.

S. Amen.

o Diboan ma batang i tu alaman.

o Molo ndang andong ulaon di alaman, dipadalan ma bagian

II i di jabu manang di gareja.

II. DI ALAMAN

o Molo ndang maraturan dope huria i di jabu, dipungka ma ulaon on

dohot bagian I, Pamungkaan no.1

o Molo adong na naeng mandok hata, pasahathon ulos d.n.a.,saonari

ma dilehon tingki.

1. Pamasumasuon ni batang

- Ende


64

Ale Debata, mual ni nasa hangoluan, marhite sian aek do

pasahat Ho pasupasum tu hami. Ai marhite sian i do mangolu

nasa na tinompan, jala di bagasan aek do muse tardidi hami tu

bagasan hamamate dohot haheheon ni Anakmu Jesus Kristus.

Hupangido hami tu Ho, parbadiai ma aek on na naeng

pangkeonnami songon tanda ni pasupasum dohot denggan ni

basam maradophon dongannami naung monding on.

Marhite Kristus Tuhannami.

S. Amen.

- Dipispis ma batang i dohot aek na badia.

M. Ro ma hamu saonari, hamu angka surusuruan, ro ma hamu

angka nabadia! Tomutomu jala udurhon ma donganta on tu

jolo ni Debata na tumimbul i.


Ale Debata Nasunbasa, tu bagasan tanganmu do hupasahat

hami dongannami naung monding on.

Porsea situtu do hami: raphon sude angka dongan naung mate

di bagasan Kristus, paheheonmu do ibana marhitehite Kristus

i.

Mandok mauliate do hami tu Ho ala ni sude na denggan

naung binasabasahonmi tu ibana di tingki ngoluna di tano on.

Sudena i paposhon rohana nuaeng.

65

Dibahen i hupangido hami tu Ho: bungka ma di ibana di

bagasan hamuliaonmu. Ai nunga talu hamatean i marhite

Jesus Kristus na mangolu raphon Ho, di bagasan hasadaon ni

Tondi Porbadia, sahat ro di saleleng ni lelengna.

S. Amen.

2. Hata ni Debata

M. Tatangihon ma Barita Nauli ni Jesus Kristus na

pinatomutomu ni Nabadia Mateus (25 : 31 – 46)

S. Pujipujian ma di Ho ale Kristus.

M. Songon i ma Barita Nauli na pinatolhas tu Hita sadari on.

S. Pujipujian ma di Ho, ale Kristus.

- Ende

3. Tangiang Hatopan

M. Hamu angka dongan, andorang so tataruhon donganta on tu

udean, tatangiangkon ma jolo na matean i, angka donganta na

marsitaonon, na manangisi ompuna/natorasna/anakna naung

monding on.

M. Ale Debata, Ama parholong roha, sai didongani Ho do hami

marhite asi ji roham. Tatap ma angka dongannami on na laho

sirang sian na hinaholongan nasida i. Martangiang ma hita:

S. Tatangihon ma Tuhan tangiangnami.

66

M. Ale Debata, sipangapul na sumurung, Ho do paubahon arsak

ni roha gabe halalas ni roha. Apuli ma dongannami on,

pahehe ma nasida sian haholomon ni arsak ni roha dohot

andung ni roha on; sondangkon ma tu nasida hatiuron ni

bohim, asa tarapul rohanasida. Martangiang ma hita:


M. Ale Debata, silehon hosa dohot hangoluan, dibahen Ho do

hamatean i gabe buha ijuk hangoluan na imbaru. Marhite sian

silang ni Anakmu Jesus Kristus, paos ma roha ni sude angka

na porsea di Ho. Ai marhite sian hamamatean i. Jala marhite

sian haheheonna do dipasuang Ibana hangoluan i.



M. Ale Debata, Amanami Nasunhinagogo, hangoluan na

manongtong i ma huhalungunhon hami. Disi ma apusanmu

nasa iluilu sian simalolongnami, disi ma hami sude

marolopolop di bagasan hatuaonmu, marhite Kristus

Tuhannami.

S. Amen.

4. Haboborhat sian huta

- Ende

- Laho borhat didok ma:

67

M. Ale ……………………….., sirang ma hami sian ho.

Borhat ma sian hutam, jala masuk ma tu huta na badia i, i ma

huta Jerusalem na manongtong. Tinggalhon ma rura

partangisan on, jala halashon ma tano na pinarbagabaga i,


- Borhat ma tu gareja manang tu alaman

- Saleleng marudur ma hita. Denggan do didok tangiang Rosario disi.

- Molo langsung tu undean, ditorushon ma di bagian IV

III. DI GAREJA

1. Pamungkaan

- Ende




Ale Debata na marasi roha mida angka pardosa jala na

mambahen martua angka nabadiami.

Bereng ma naposom si ……………………………… naung

hubandahon hami bangkena (sadari on). Sai palua ma

naposomon sian nasa ihotihot ni dosa, jala sai janghon ma

ibana di ari haheheon na songkal i, rapa dohot halak na

pinillitmi. Marhite Kristus Tuhannami.

2. Hata ni Debata

68

Panjahon parjolo

M. Tatangihon ma hata ni Debata songon na tarsurat di Buku ni

Panurirang Jesaya (25: 6 – 9)

Padirion ni Tuhan i ma saluhut bangso sada sipanganon

haroan di dolok on, haroan na tabo, sian tuak anggur naung

leleng sinimpan, angka sipanangon na tabotabo jala na talmis,

sian anggur na pita na tangkas tarpillit. Dung i pasisionna ma

angka tujung na hinuphuphon tu angka bangso parbegu.

Bonduthononna ma hamatean na salelenglelengna jala

apusonna ma nasa hahurangan ni bangsona di sandok tano on.

Ai nunga didok Tuhan i songon i. Jadi dohonon ni halak ma

di ari na sasada i: “Ida ma! Ibana do Debatanta na sai

tapaimaima i, Ibana do in a gabe hatuaonta!”

Songon i ma dipangkuli Debata hita sadari on.


- Ende : BETK no.284 (Tuhan i marmahan ahu)

Panjahon Paduahon

M. Tatangihon ma hata ni Debata na sinurat ni Apostel Paulus tu

huria Roma (8 : 14 – 23)

Hamu angka dongan, nasa na tinogihon ni Tondi ni Debata,

angka i do anak ni Debata. Ai ndang Tondi hatoban dijalo

hamu. Mangasahon i do panjounta Abba, mandok: Ale

69

Amang! Laos Tondi ni Debata do na manghatindangkon di

tondinta paboa na tutu hita anak ni Debata. Molo naung

donganna hita di sitaonon, gabe donganna ma hita sogot nang

di hasangapon. Ai hira na so ada do hurajumi sitanonon na di

hasiangan on martimbangkon hasangapon sipapataron tu hita

sogot. Ai malungun do nasa na tinompa i maimaimahon

tinggkina, asa dipapatar angka anak ni Debata. Ai dipatunduk

do na tinompa i tu habusuhon, ndanda sian lomona, tung

binahen ni na patundukhonsa do. Huhut mangkirim:

paluaonna na tinompana sian pangadopan hamagoan, sahat tu

haluaon hasangapon na di angka anak ni Debata. Alai taboto

do, sai tong dope nuaeng rap marhoi jala mambege nasa na

tinompa i. Ndanda holan nasida, alai dohot do hita, angka na

manjalo patumonaan ni Tondi i, marhoihoi do di bagasan

rohanta, paimaimahon haanahon i, asa disi marhaluaon nang

pamatangta.

Songon i ma dipangkulingi Debata hita sadari on.

S. Mauliate ma Debata.

- Ende: BETK no 218 (Naung tahu hamatean i).

Panjahon Patoluhon

M. Jongjong ma hita laho manangihon Barita na uli ni Jesus

Kristus na pinatomutomu ni nabadia Johannes (11 : 21 – 27)

70

S. Pujipujian ma di Ho, ale Kristus.

Di tingki i ninna si Marta ma mandok Jesus: “Aut na dison

Ho ale Tuhan, ndang tagamon mate ibotongki! Alai nang

nuaeng pe huboto do, lehonon ni Debata do tu Ho nasa

aipangidoonmu tu Ibana”. Gabe didok Jesus ma tu ibana: “Na

hehe do ibotomi”. Jadi didok si Marta ma tu Jesus: “Olo,

huboto do, na hehe do ibana sogot di ari haheheon i, di ari

parpudi.” Dung i ninna Jesus ma mandok ibana: “Ahu do

haheheon dohot hangoluan. Na mangolu do na porsea di Ahu,

na so tupa mate ibana salelenglelengna! Porsea do ho disi?”

Dung i didok ma tu Ibana: “Olo Tuhan, porsea do ahu. Ho do

Kristus, Anak ni Debata na naeng ro tu portibi on”.

Songon i ma Barita Nauli na pinatolhas tu hita sadari on.

S. Pujipujian ma Ho, ale Kristus.

- Jamita manang ende.

3. Tangiang Hatopan

M. Hamu angka dongan, tatangiangkon ma donganta naung

monding on, angka sisolhot, tondong dohot aleale na

tininggalhonna, asa diasii huhut diapuli Debata nasida.

Ale Debata, Ama ni nasa na mangolu tatap ma dongannami si

………………. on. Uju mangolu ibana di hasiangan on, gabe

71

anakmu do ibana saonari di jabum, anggiat mangolu ibana di

jolomi rap dohot sude halak nabadia.

Martangiang ma hita.


M. Ale Debata, silehon hosa dohot hangoluan, marpamuati ma

roham mida dongannami naung monding on. Unang ma jujur

angka dosana dohot hasalaanna, alai pahehe ma ibana tu

hangoluan na manongtong.

Martangiang ma hita.


M. Ale Debata, parasi roha na basa, apuli ma roha ni angka

sisolhot, tondong dohot aleale ni dongannami on. Apusi ma

iluilu sian simalolongnasida jala padao ma nasa arsak sian

rohanasida.



M. Ale Debata, parholong roha na basar, mardongan serep ni

roha hutangiangkon hami dongannami si ………………..

naung monding on. Saleleng di ngoluna manghirim jala

porsea do ibana di Ho. Ala ni i, sai loas ma ibana masuk tu

sambulo na di surgo i, huhut mariaia di bagasan halalas ni

roha na manongtong. Marhite Kristus Tuhannami.

72

S. Amin.

- Ende

4. Haboborhat tu udean

M. Hamu angka dongan, di bagasan haporseaon do tapaimaima

Jesus Kristus Tuhanta. Paubaonna do dagingta na lea on gabe

doshon dagingna na sangap i. Di bagasan panghirimon on

taboan ma saonari donganta si ……………… tu udean, asa

disi ma ibana maradian dibagasan dame, paima ro Tuhan laho

pahehehon angka na mate. Laos borhat ma hita tu udean di

bagasan dame ni Tuhan i.

S. Mauliate ma di Debata.

- Marudur ma tu udean mardongan ende dohot tangiang.

IV. DI UDEAN

1. Pamasumasuon di tanoman.


Ale Jesus Kristus, nunga diparbadiai Ho tanoman ni sude

halak na porsea, ala Ho sandiri nunga mate laos ditanom. Alai

nunga hehe Ho gabe hangoluan dohot haheheon di hami. Ala

ni i do hutanom hami angka dongannami naung monding i di

bagasan haporseaon Paska, haporseaon di haheheon i.

Hupangido hami tu Ho: pasupasu ma tanoman on gabe tanda

pos ni roha dohot panghirimon Kristen. Bahen ma

73

dongannami on maradian di bagasan damem. Pahehe ma

ibana jala pasonang ma ibana. Ho na mangolu jala na

marhamuliaon ro di saleleng ni lelengna.

S. Amin.

- Tanoman i dipispis dohot aek na badia.

2. Pananomon

- Batang i ditantan tubagasan tanoman.

M. (Manaburhon saotik tano tu atas batang i)

Ale…………….. hupasahat hami ma ho tubagasan tangan ni

Debata na tumimbul i, naung manjadihon tano on dohot sude

isina.

M. (Manandai batang i dohot silang)

Mangolu ho nuaeng di bagasan hamonangan ni silang na

badia, ai marhite sian i nunga ditaluhon Kristus hamatean i.

M. (Mandabuhon bungabunga tu batang i)

Marlas ni roha ma ho raphon angka nabadia di bagasan

hatuaon naung pinarade ni Debata di hita sude.

M. (Mamispis batang i dohot aek na badia)

Nunga tarididi ho jala nunga mangulahi tubu ho sian aek

dohot sian Tondi Porbadia. Halashon ma Paska ni Tuhan i ro

di saleleng ni lelengna.

S. Amen.

74

3. Tangiang hatopan

M. Hamu angka dongan, tatangiangkon ma saonari donganta

naung tartanom dison, anggiat dijanghon Tuhan i ma ibana di

hangoluan dohot hasonangan na tongtong.

M. Ale Jesus Kristus, nunga didok Ho:

“Ahu do haheheon dohot hangoluan. Na mangolu huhut

porsea di Ahu, na so tupa mate ibana salelenglelengna.”

Hupangido hami tu Ho:

pahehe ma dongannami on jala pauba ma dagingna na lea on

gabe doshon dagingmu na sangap i.



M. Ale Jesus Kristus, di tingki ngolum di tano on olo do Ho

pahehehon na mate. Antong, sai marlomo ni roha ma Ho

mamasumasuhon tu dongannami on hangoluan na

manongtong.



M. Ale Jesus Kristus, marhite sian pandidion i nunga diparbadiai

Ho dongannami on gabe ruas dohot siseanmu. Antong, sai

marlomo ni roha ma Ho manjanghon ibana nuaeng tu

tongatonga ni angka naung pinillitmi.

75



M. Ale Jesus Kristus, dung mate si Lasarus ditangisi Ho do

ibana. Sai marlomo ni roha ma Ho mangapusi nasa iluilu sian

simalolongnami.



M. Ale Jesus Kristus, nionjar ni asi ni roham sai diapuli Ho do

angka na marsak roha. Hupangido hami tu Ho:

tambai ma haporseaonnami di holong ni roham anggiat

tarapul rohanmi.



M. Rap ma hita saonari mandok tangiang ni Tuhan i.

S. Amanami …………

M. Ale Debata Nasunbasa, pasingot ma tu rohanami na

holan satongkin sambaing do ngolunami di tano on, jala na so

tontu do tingki ni hamamatenami.

Hupangido hami tu Ho:

Sai didongani Tondi Porbadia i ma hami tongtong, asa togu

haporseaonnami, hot panghirimonnami jala bagas holong ni

rohanami mida sude dongan. Sai songon i ma pasauthon lomo

76

ni roham saleleng di ngolunami on. Jala dung mate hami

sogot, papungu jala pasada ma hami dohot sude angka

dongannami naung manjoloani hami di bagasan

hamuliaonmu na marhamuliaon i.


S. Amen.

M. Marhite sian asi ni roha ni Debata sai maradian ma donganta

on dohot sude angka dongan naung monding i di bagasan

dame ni Tuhan i ro di saleleng ni lelengna.

S. Amen.

- Ulaon i boi do ditutup dison marhite na mangendehon tanda silang.

- Ditutup ma tanoman i.

4. Penutup

- Panutup on boi do ditinggalhon. Molo dipangke, dipadalan ma dung

tartutup tanoman i.

- Silang i dipajongjong di tanoman.

M. Ale Debata, marhite sian silang i do hami dipalua. Palua ma

dongannami on sian hamatean, jala lehon ma tu ibana

hangoluan na saleleng ni lelengna.

S. Amen.

- Disuan ma hau manang bunga di tanoman i:

M. Ale Debata, ndang na ganda eme, anggo so madabu tu tano

jala mate. Dung pe mate asa godang parbuena. Sai martumbur

77

ma di dongannami on hangoluan sian hamatean jala

hasonangan sian hasusaan.


S. Amen.

M. Ale Debata Nasunhinagogo, pasupasu ma hami sude jala

patogu ma di rohanami be haporseaon di haheon sian na

mate.

- Diendeheon


Amen.

ATURAN MANANOM DAKDANAK

I. DI JABU MANANG DI ALAMAN

1. Pamungkaan

M. Tapungka ma ulaonta on


Amen.

- Ende Pamungkaan

M. Hamu angka dongan, sada silang na borat na ampe tu sada

ripe, i ma: molo mate sada sian ianakhonna na hinaholongan

i. Andorang so matoras ditanda ibana Debata di bagasan

haporseaon, andorang so dihilala ibana hasusaan dohot

78

hajahaton di portibi on, nunga borhat ibana sian

tongatonganta. Di tingki arsak ni roha si songon i on ma

apulapul di hita: Debata sandiri do patorashon roha dohot

pingkiran ni ianakhonta. Hatiuron ni Debatado manondangi

ibana gabe anak hasian ni Debata ro di salelengna. Didok

Debata do: “Ala anaha, unang ho mabiar, ai Ahu do sipalua

ho. Nunga pola hujou goarmu, Ahu nampuna ho.”

- Ende Pamungkaan diuduti




Ale Debata Ama, tu Ho do hupasahat hami ianakhnnami on

mardongan pos ni roha di holongmu na so hea manadingkon

hami jolma. Nunga dihaholongi Ho ibana di tano on. Dibahen

i, boan ma ibana tu inganan hatiuron dohot hasonangan.

Ndang adong be disi na hansit manang na dangol. Holan

halalas ni roha do dohot dame, di bagasan Jesus Kristus

raphon Tondi Porbadia ro di saleleng ni lelengna.

S. Amen.

- Molo adong na naeng mandok hata, saonari ma dilehon tingki.

2. Pamasumasuon ni batang i

- Batang i dipispis dohot aek na badia.

79

M. Huboto do na mangolu sipalua ahu. Naeng idaonhu Ibana di

bagasan hamuliaonna, ala naung hubolus haholomon ni ngolu

on. Di bagasan Ibana do ahu nuaeng mangolu mardongan

olopolop ro di saleleng ni lelengna.

S. Amen.


Ale Tuhan, sai marlomo ni roha ma Ho manangihon

tangiangnami on. Ho do nampuna ngolu ni jolma, saluhutna i

marguru di Ho sambng do. Uju i nunga dibasabasahon Ho tu

hami ianakhonnami on. Urupi ma hami saonari sirang sian

ibana mardongan habengeton, ai nunga dijou Ho ibana. Pos si

tutu rohanami: Nunga dijanghon Ho ibana di lambungmu,

dao sian hajahaton dohot hasusaan ni portibi. Sai tongtong ma

pinuji Goarmu ro di saleleng ni lelengna.

S. Amen.

3. Tangiang hatopan

M. Hamu angka dongan, nionjar ni asi ni rohanta tatangiangkon

ma angka donganta na marsitaonon on: amanta, inanta dohot

nasida saripe, asa dapotan apulapul nasida sian Tuhan i.

M. Ale Ama Pardengganbasa, tatap ma angka dongannami on na

manangisi anakhonna naung mate i. Dongani ma nasida

marhitehite hagogoonmu di tingki sitaonon on.

80



M. Ale Ama parholong roha, marlas roha do hami di na tubu

dakdanak on, mardok ni roha do hami nuaeng di na mate

ibana. Sai sumurut ma haholomon ni arsak ni roha i binahen

ni hatiuron ni haporseaonnami.



M. Ale Ama parasi roha, tung borat situtu do silang dohot

sitaonon na niampehonmi tu angka dongannami on. Sai

margogo ma nasida mamorsan silang i laho mangihuthon

Jesus Kristus naung manjoloani tu hangoluan dohot

hasonangan na manongtong i.



M. Ale Ama pangapul na denggan roha, Ho do na mandodo roha

ni hami jolma. Diboto Ho tangkas roha ni natoras ni

dakdanak on, na nialapmu sian jolonasida. Sai Ho ma

mangapuli nasida jala suanhon ma tu nasida haporseaon

dohot panghirimon di asi dohot holong ni roham marhite

Kristus Tuhannami.

S. Amen.

81

- Ende (di tingki on ma ditutup batang i).

4. Haboborhat tu udean

M. Di na borhat hita tu udean taingot ma lapatan ni silang na

taboan tusi. Hita sude mardalan di bagasan lingomanna

dompak huta na badia, i ma Jerusalem na imbaru. Disi ma

apusan ni Debata nasa iluilu sian simalolongta. Ndang adong

be disi hamatean manang arsak ni roha. Nang anggukangguk,

nang na hansit ndang adong be disi. Ai nunga salpu na

parjolo i laos borhat ma hita tu udean di bagasan dame ni

Tuhan i.


- Marudur tu udean mardongan ende dohot tangiang.

II. DI UDEAN

1. Pamasumasuon ni tanoman


Ale Debata, sitompa langit dohot tano on, manang na

mangolu manang na mate pe hami, tong do toguan ni

tanganmu hami, jala tiopon ni siamunmu hami. Dibahen i,

ondingi ma tanomon ni ianakhonnami on marhite tanda silang

na hupajongjong hami dison. Nunga didokhon Ho dakdanak

on maninggalhon hami dohot hutana asa maringanan di

jabum dohot hutam. Ndang be male ibana, ndang be mauas,

82

ndang be ditinggang las ni ari manang dia na mohop pe.

Alana nunga dibahen Ho ibana manganhon parbue ni hau

hangoluan ro di saleleng ni lelengna.

S. Amen.

- Tanoman i dipispis dohot aek na badia.

2. Pananomon

- Batang i ditantan tubagasan tanoman

M. (Manaburhon saotik tano tu atas batang i)

Ale ……………………, nunga ditinggalhon ho tano on.

Nunga ditinggalhon ho jabu ni natorasmu. Mangolu ma ho

olat ni on di jabu ni Amanta Debata.

M. (Manandai batang i dohot silang)

Nunga tardidi ho di bagasan goar ni Ama dohot Anak dohot

Tondi Porbadia. Anak ni Debata do Ho, na pinalua ni Tuhan i

marhite silangna.

M. (Mandabuhon angka bunga tu batang i)

Halashon ma saonari hinauli ni huta ni Amanta na disurgo.

Painte ma hami disi. Satongkin nai rap hita muse di bagasan

hasonangan i.

M. (Mamispis batang i dohot aek na badia)

Rap hita dipangolu, jala rap hita dipabangkit tu gomgoman

banuaginjang, di bagasan Jesus Kristus, Tuhanta.

83

S. Amen.

3. Tangiang Hatopan

M. Hamu angka dongan, nunga tatanom ianakhonta naung mate

on. Nang pe marsak situtu rohanta, nunga dipatiur sondang ni

haporseaonta hita. Tapasahat ma saonari angka pangidoanta

tu Tuhan i asa lam tarapul rohanta. Ai nunga didok Ibana:

“Loas hamu ma angka dakdanak ro tu Ahu, ai di angka

sisongon i do harajaon banuaginjang i.”

M. Ale Jesus Kristus, dihaholongi Ho do parroha na ias jala na so

marlindang. Bahen ma ankhonnami on marlas ni roha, ai

ndang hea dope mangulahon dosa ibana.



M. Ale Jesus Kristus, saleleng di ngolum di tano on sai diapuli

Ho do na marsak roha, na matean dohot na marsitaonon.

Apuli jala tungkoli ma saonari amanta dohot inanta on na

laho sirang sian anakhonna i.



M. Ale Tuhan, nunga hehe Ho sian na mate jala dipabangkit gabe

silehon hangoluan tu nasa jolma. Bahen ma hami sude

84

manghirim haheheon i, jala pabangkit ma hami tu

hamuliaonmu.



M. Ale Tuhan, di na jongjong hami saonari humaliang tanoman

ni dakdanak on, ajarhon ma tu hami mandok: Ale Amang,

unang ma rohangku saut, alai roham ma. I ma tutu Tuhan, sai

ro ma harajaonmu. Sai saut ma di tongatonganami on nasa

lomo ni roham ma. Ai Ho do Amanami na mangkaholongi

hami songon anakmu. Ho do sipangapul bolon di tingki

tangis hami jala marhoihoi binahen ni hasusaan na di tano on.

Unang ma tinggalhon hami, alai dongani jala tungkoli ma

hami laho manguduti dalan ni ngolunami. Patiur ma

langkanami laho mandapothon mual hangoluan, asa hami pe

sogot raphon sude dongan, naung laho sian portibi on, marlas

ni roha di lambungmu, sahat ro di saleleng ni lelengna.

S. Amin.

M. Ale Debata Nasunhinagogo, pasupasu ma hami sude, jala

patogu ma di rohanami be haporseaon di haheheon sian na

mate.

- Diendehon

85


Amen.

UPACARA CONVALIDATIO

PAMUNGKAAN

01. Hata Patujolo

M. Hamu amang dohot hamu inang, Maksud ni parpunguanta on,

i ma laho patoguhon pardongansaripeonmuna hombar tu

aturan, ruhut dohot hasomalan ni Huria Katolik.

(taringot tusi, nunga hujalo hami be ijin/dispensasi sian Amanta Uskup)

Parrohahon hamu ma, ai Debata do na mangiringiring jala

mandongani hita di bagasan ulaonta on.

02. Tangiang Pamungkaan

M. Martangiang ma hita: (hohom satongkin)

Ale Tuhan, Debatanami, saonari ama dohot ina on naeng

mangadop tu Ho. Di jolomi do nasida naeng patoguhon

pardongansaripeonnasida i hombar tu aturan, ruhut dohot

hasomalan ni Huria Katolik. Dibahen i, hupangido hami tu

Hu, pasupasu ma nasida. Papatar ma holongmi di bagasan

ngolu ni pardongansaripeonnasida i. Sai anggiat ma nasida

mangolu di bagasan hasadaon ni roha, tongtong

masipauneunean jala masiantusan huhut rap masipasonangan.

86


S. Amen.


03. Panjahaon I : Amdung 2 : 8 – 10, 14 – 16a/1Kor 12 : 13 – 13 :

8a/ 1Yoh 4 : 7 – 12.

04. Ende

O5. Barita Nauli : Joh 15 : 9 – 12/Mat 22 : 35 – 40/Mat 19 : 3 – 6

06. Jamita

PATOGUHON PARDONGANSARIPEON

M. (Mangido tu sude dongan asa jongjong)

Hamu amang dohot inang, paimbaru hamu ma padan

pardongansaripeonmuna i, di jolo ni Debata Nasunhinagogo i,

di jolonami, utusan ni Hurianta, dohot di jolo ni angka saksi

on (nang di jolo ni sude dongan na pungu nuaeng dison).

(Ama dohot ina i mameakhon tangan parsiamunna be di atas ni Buku

Nabadia i. Dung i ganup nasida marsadasada paimbaruhon padanna be,

songon on):

Ama. Di jolo ni malim, di jolo ni sude angka saksi, (nang di jolo ni

sude dongan, na pungu nuaeng dison) ahu ……………….

Paimbaruhon padan pardongansaripeonhu dohot si

………………. na dison nuaeng. Ahu marpadan naeng

tongtong burju tu ibana di tingki las ni roha, hahipason dohot

87

hagabeon nang di tingki sitaonon pangunjunan dohot di tingki

arsak ni roha pe.

Ahu marpadan naeng tongtong mangkaholongi, manghormati

huhut pasangaphon ibana saleleng ahu mangolu.

Songon i ma padanhon hupadanhon di bagasan goar ni

Debata marhite Buku Nabadia on.

Ina. Di jolo ni malim, di jolo ni sude angka saksi, (nang di jolo ni

sude dongan, na pungu nuaeng dison) ahu ……………….

Paimbaruhon padan pardongansaripeonhu dohot si

………………. na dison nuaeng. Ahu marpadan naeng

tongtong burju tu ibana di tingki las ni roha, hahipason dohot

hagabeon nang di tingki sitaonon pangunjunan dohot di tingki

arsak ni roha pe.

Ahu marpadan naeng tongtong mangkaholongi, manghormati

huhut pasangaphon ibana saleleng ahu mangolu.

Songon i ma padanhon hupadanhon di bagasan goar ni

Debata marhite Buku Nabadia on.

M. (dung diulosi ama dohot ina i, didok):

Di bagasan goar ni Hurianta dohot di jolo ni angka saksi,

(nang di jolo ni sude angka dongan na pungu nuaeng dison),

huparhatutu do pardongansaripeonmuna on saonari gabe

pardongansaripeon Katolik.

88

(*) Jala (angka) ianakhonmuna naung tubu andorang so

parpadanan on, huparhatutu do songon ianakhonmuna sian

pardongansaripeon Katolik.

Sai anggiat ma Sakramen pardongansaripeon on gabe mual ni

hagogoon dohot pasupasu na manongtong di humana na dua.

Di bagasan goar ni Ama dohot Anak (†) dohot Tondi

Porbadia.

S. Amen

M. Antong, taparrohahon ma na nidok ni Tuhan i: “Naung

pinadomu ni Debata, ndang jadi sirangaon ni jolma”.

M. (mamispis am ina i dohot aek na badia).

07. Tangiang pamasumasuon


Ale Tuhan, Debata Nasunhinagogo, hupangido hami tu Ho:

Pasupasu ma ama dohot ina on, naung paimbaruhon padan

pardongansaripeonnasida di jolmi. Pahot ma holong ni roha

nasida, asa tongtong martua ngolunasida.

Ale Tuhan, ondingi ma nasida sian lungun ni roha, dele ni

roha nang sian sude angka parmaraan.

Sai anggita ma margogo nasida mangkangoluhon

haporseaonasida jala maneanhon haporseaonnasida it u angka

ianakhonnasida. Sai anggiat ma nasida margogo

89

mangkaburjuhon padan pardongansaripeonnsaida jala

tongtong masihaholongan. Sudena i ale Amang, hupasahat

hami tu Ho, marhite Anakmu, Jesus Kristus, Tuhannami, na

mangolu jala na mangarajai raphon Ho di bagasan hasadaon

ni Tondi Porbadia sahat rodi saleleng ni lelengna.

S. Amen.

M. (Malim mamispis nasida dohot aek na badia)

08. Panutup

M. Hamu angka dongan sudena, andorang so tapaujung ulaonta

on rap ma hita saonari manangiangkon tangiang na niajarhon

ni Tuhanta i tu hita, mandok:

S. Amanami ………..

M. Hamu amang dohot inang, sai hot jala togu ma hamu di

bagasan parpadananmuna i, hombar tu poda ni angka

ompunta sijolojolo tubu na mandok:

Ai arirang ni sigaol Manuk ni batara siang

Tondi naung marsaor Pamatang pen dang jadi sirang

S. I ma tutu.

M. Tuhan i mandongani hamu.

S. Nang hamu pe didongani Tuhan i.

90

M. Sai anggiat ma hita sude, tongtong diondingi jala ditogutogu

pasupasu dohot pangaramotionni Debata Nasunhinagogo i:

Ama dohot Anak (†) dohot Tondi Porbadia.

S. Amen.

M. Mulak ma hita saonari di bagsan dame ni Tuhan.


M. Horas ma di hita sauhutna.

S. Horas ma tutu.

PAMASUMASUON NI INA

NA NAENG MARPOSOPOSO

Hatorangan

o Diparade ma aek na badia

o Panjahaon Barita Nauli : Mat 1 : 18 – 24 / Luk 1 : 26 – 38

PAMUNGKAAN

M. Di bagasan goar ni Ama dohot Anak dohot Tondi Porbadia.

S. Amen.

M. Anggiat ma diparrohahon jala didongani Amanta Debata hita,

dipatuduhon ma hasabasaonna i jala dilehon damena na

manongtong it u hita saluhutna.

S. Ro di saleleng ni lelengna.

91

M. Hamu sude angka dongan na hinaholongan di bagasan

Tuhanta Jesus Kristus, ndang piga ina berengon na apala tung

serep situtu rohana. Alai sian sude ina, holan Inanta Maria

Nabadia, Ina ni Tuhanta Jesus Kristus do, na serep marroha

na patutoru dirina i ma na gabe tiruan di angka ina.

Panurirang Jesayas, paboahon naeng adong sahalak na

marbaju na naeng gabegabean jala manubuhon sada

paosoposo, bahenon ma goarna, Emmanuel, lapatanna:

Debata mandongani hita. Maria do na pinillit ni Amanta

Debata gabe ina ni Sipalua portibi on. Mardongan las ni roha

dohot gok panghirimon, dipaimaima inanta Maria hatutubu ni

Anakna. Songon i nang hita saonari manghirim, inanta on pe

paimaimahon hasosorang ni ianakhonanasida mardongan las

ni roha. Antong saonari, hamuna sude angka dongan, rap ma

hita dohot inanta on, asa tongtong didongani jala diramoti

Amanta Debata ibana.

02. Tangiang

M. Martangiang ma hita :

Ale Debata, Nasunhinagogo jala na manongtong, nunga

dipilit Ho Maria Nabadia gabe ina ni Jesus Kristus, Sipalua

hami. Tatap ma nuaeng inanami on na mardongan gok

panghirimon ro tu jolom mangido pangurupion dohot

92

pangaramotionmu laho di dirina dohot tu na

hinagabegabehonna i. Anggiat ma marhite pangurupionmu

boi hipas inanami on di bagasan hahipason posoposo i na

gabe halalas ni roha dohot hatuaon di inanami on nang di

nasida na saripe. Jala sai tongtong ma Ho mandongani

posoposo i marhite asi ni roham na so halompoan i, asa

ujungna boi ma dakdanak i gabe jolma na marguna jala

marpangoloi tu Ho sogot. Marhite Kristus Tuhannami.

S. Amen


03. Panjahaon I: Jes 7 : 10 – 14

04. Ende

05. Barita Nauli : Mat 1 : 18 – 24 / Luk 1 : 26 – 38

06. Jamita

PAMASUMASUON

07. Ende


Tuhanta Jesus Kristus, tapangido ma saonari pasupasu ni

Tuhan i laho di inanta on.


Ale Debata, Parasiroha na manongtong, marhite Panurirang

Jesaya nunga hubege hami Ho naeng mangalehon sada tanda,

93

na mamboan halalas ni roha dohot hatuaon, i ma:

Gabegabean ma sada na marbaju, jala tubuhononna ma sada

anak, jala bahehonna ma goarna: “Emmanuel”, lapatanna:

Debata mandongani hita.

Hupangido hami ma tu Ho, ale Amang, sai dongani jala

ramoti ma tongtong inanami on, marhitehite pasupasum

dohot pangaramotionmu, asa tongtong di bagasan las ni roha,

dame jala sonang so hariboriboan paimaimahon hatutubu ni

ianakhonna i, jala sai anggiat ma posoposo i tubu di bagasan

hahipason dohot parhorasan. Anggiat ma marhitehite

pangurupion dohot pangaramotionmu, sai huhilalahon hami

ma na tongtong do Ho mandongani hami ojahan nang mual ni

halalas ni roha dohot hatuaon ni bangsom. Marhite Kristus

Tuhannami.

S. Amen.

M. (huhut mamispis inanta i dohot aek na badia)

Sai didongani jala dilinggomi Amanta Debata ma hamu,

huhut diramoti jala dijagai Ibana ma hamu di bagasan asi ni

rohana na manongtong i.

S. Amen.

08. Ende

09. Tangiang Hatopan

94

M. Tapasahat ma saonari angka tangiangta tu Amanta Debata,

asa anggiat ma tongtong didongani jala diondingi Ibana

inanta on.


Ale Debata, Nasunhinagogo jala na manogtong, porsea do

hami na tongtong do didongani Ho hami. Ala ni i hupangido

hami ma tu Ho, sai tangihon ma angka tangiang dohot angka

pangidoannami on!

(Boi ma dipangido sian angka na taronjar rohana laho mambahen

tangiang, manang songon tangiang naung pinarade dison)

1. Ale Tuhan, naung dipasupasu jala diondingi Ho do pomparan

ni si Abaraham na uju i. Alan ii hupangido hami, sai ondingi

ma naposoM, na mardongan gok haporseaon dohot

panghirimon paimaimahon hatotopap ni ianakhonna.


2. Ale Amang, nunga disuru Ho Anakmu Jesus Kristus tu

portibi on marhite sian inanami Maria Nabadia naung

pinasupasum. Anggiat ma Ho olo tongtong mandongani

naposom marhitehite pasupasum dohot pangaramotionmu.


95

3. Ale Tuhan, ondingi jala ramoti ma posoposo na di bortianna

nuaeng, anggiat tongtong di bagasan hahipason jala boi

sorang di bagasan parhorasan.


4. Nunga dibahen Jesus Kristus gabe sahalak dakdanak na

marpangoloi tu Ho, tu natorasna dohot tu angka donganna.


5. Ale Tuhan, nunga dibahen Ho Jesus gabe ojahan ni halalas ni

roha dohot hatuaon ni ripe nabadia na di Nazaret i. Anggiat

ma marhitehite pangaramotion dohot pangondingionmu

posoposo i tubu di bagasan hahipason jala anggiat ma ibana

gabe dalan halalas ni roha dohot hatuaon di natorasna dohot

di sude angka tondongnasida i.


M. Ale Tuhan, hupasada hami ma sude angka pangidoannami on

dohot tangiang na niajarhon ni Jesus Kristus tu hami:

S. Amanami ……………

M. Ale Tuhan, Debatanami jala Amanami na di surgo jotjot do

hulului hami Ho, na sasintongna jonok do Ho tu hami jala Ho

mian di hami. Pangolu ma haporseaon sisongon i, di bagasan

dirinami be, tarlumobi di inanami on na naeng paimaimahon

hatotopap ni ianakhonna, jala sai pasupasu ma tongtong

96

ibana. Ai Ho do Debatanami na manongtong na tongtong

mandongani hami. Marhite Kristus Tuhannami.

S. Amen.

10. Ende

PANUTUP


Tuhanta Jesus Kristus, nunga sun be ulaonta on. Rap ma hita

saonari mangido pasupasu ni Tuhan i.

(Huhut manurdukhon tangan tu natorop i)

Ale Debata Nasunbasa jala na manongtong, pasupasu jala

ramoti ma tongtong ruas ni bangsom. Togutogu jala ajari ma

hami, asa boi hami mangolu hombar tu hatami, sai tongtong

ma Ho Emmanuel (lapatanna: Debata mandongani hami) di

hami saluhutna. Di bagasan goar nia Ama dohot Anak dohot

Tondi Porbadia.

S. Amen.

M. Hamu sude angka dongan na hinaholongan, sai tongtong ma

hita marsitutu padengganhon ngolunta, asa tongtong hita

mian di bagasan dame ni Tuhan i.


M. Horas ma di hita saluhutna

S. Horas ma tutu.

97

PAMASUMASUON NI PANGULA NI HURIA

(Isara I)

PAMUNGKAAN

01. Hata huhuasi

M. Goar ni Tuhan i mangurupi hita

S. Ai Ibana manompa langit dohot tano

M. Ale Tuhan tangihon ma tangiangnami


M. Tuhan i mandongani hamu


02. Tangiang


Pinuji ma Ho, ale Debata, hatimbulon dohot hagogoon dohot

hmulaiaon dohot hatongamon dohot pujipujian; gok di Ho do

tahe nang saluhut na di banua ginjang dohot na di tano on!

Gok di Ho do ale Debata harajaon, jala dipatimbul Ho dirim

di atas ni saluhut na marjujungan. Marharoroan sian Bohim

do hamoraon dohot hamuliaon, jala Ho panggomgomi di

saluhutna jala guru di Ho do hagogoon dohot huaso, guru di

Ho do na patimbulhon dohot margogoihon luhutna i.

Ale Tuhan, na mangiringiring jala na manogunogu rohanami,

hupangido hami tu Ho: Lehon ma tu (angka) naposom on lomo

98

ni roha na marsihohot mangaradoti angka tonami,

panindangionmi dohot aturanmi, gabe hatuaon di bangsom

sitogutoguonna. Marhite Kristus Tuhannami.

S. Amen.


03. Panjahaon I : Sirakh 10:1-8; Hab.Sal 6:3-9; 9:1-18 manang

IIJuj. 1:7-12; IPet 2:4-10

04. Ende

05. Barita Nauli

06. Jamita

ANGKA TANGIANG

M. Asi ni roha dohot uhum naeng endehononhu, ale Tuhan.

S. Martua ma na mangihuthon Ho manondong dalanmi.

M. Naeng pantas ahu marpangalaho dalan haburjuon. Sadihari

per o Ho manopot ahu, naeng ahu marpangalaho hadaulaton

ni rohangku di tonga ni jabungku.


M. Ndang olo mambahen pambahenan na jahat di jolo ni

matangku, dihagigihon rohangku do pambahenan na lilu, tung

na so jadi dais do i tu ahu.


99

M. Padao sian ahu roha pangansion, ndang hutanda hajahaton.

Manang ise na marsibuni mangkata tundal donganna, sai

siaphononhu do ibana, manang ise parmata baus dohot

parroha manggang, ndang tarparrombang ahu.


M. Sai humatamatahon do angka parburju ni luat i, bahen

donganhu sahundulan; manang ise na mangihutihut dalan

hadaulaton, ingkon ibana parhaladongku. Naso tupa maringin

di tonga ni jabungku sibahen sipaotooto; naso tupa mian di

adopan ni matangku sihatahon gabus.


M. Sai siaphononhu do ganup sogot sude angka parjahat ni luat i

umpidomhon sian huta ni Jahwe sude angka siulahon

hajahaton.


M. Hamuliaon ma di Ama dohot Anak dohot Tondi Porbadia.

S. Songon na adong di mulana, nuaeng dohot tongtong sahat ro

di saleleng ni lelengna. Amen.


Ale Debata, dihalomohon roham do, asa ganup halak

mangargahon tohonanna na niampehon tu ibana laho

manogunogu bangsom; hupangido hami tu Ho: lehon ma tu

100

(angka) naposom on roha hadaulaton dohot hatigoran nang

habisuhon laho mangulahon sangkap dohot lamo ni roham.

Jala suru ma Tondim na badia i patiurhon pingkiranna laho

mangulahon ulaonna. I ma pangidoannami tu Ho, ale Tuhan,

na mangolu jala marharajaon rap dohot Anak dohot Tondi

Porbadia.

S. Amen.

PAHOTHON PARHALADO

(Pangurus na imbaru)

Marhite on, ahu …………….. manghatindanghon, na

marsangkap do ahu manghobasi hurianta on marhitehite

tohonon naung sahat tu ahu, i ma tohonon ………………

Sai didongani Debata dohot angka Barita Nauli na hujama on

ma ahu tusi.

(Malim pasahathon angka tanda jabatan)

M. Jalo ma tanda jabatanmon jala ingot ma: ingkon

hatindangkononmu ma muse ulaonmu hombar tu jabatanmon

di adopan ni Debata Tuhanta.

(Pasupasu sian malim)

M. Dipasupasu Tuhan i ma hamu. Didompakhon Tuhan i ma

Bohina tu hamu jala diasi i ma hamu. Sai Ibana ma

dijolomuna dohot di pudimuna, laho manjaga hamu. Sai

101

martua ma hamu di na mandalanhon tohonan na niampehon

ni Debata tu hamu. Jala Ibana ma mamasumasu hamu: Di

bagasan goar ni Ama dohot Anak dohot Tondi Porbadia.

S. Amen.

M. Ale Tuhan, lehon ma tu nasida Tondi habisuhonmi.

S. Amen.

M. Lehon ma tu nasida Tondi Panorangi dohot hagogoon i

S. Amen.

M. Gohi ma nasida Tondi hadaulaton i.

S. Amen.

M. Lehon ma tu nasida bisuk dohot panganjuon.

S. Amen.

M. Sai anggiat ma marsihohot nasida di haporseaon dohot

hatigoran.

S. Amen.

M. Lehon ma tu nasida basabasam, asa tau nasida mangalehon

tirun na denggan jala na badia tu hami sude.

S. Amen.

M. Ale Tuhan, gale do hami jolma molo so di lambungnami Ho.

Lehon ma tu (angka) dongannami on nasa na hupangido hami

di bagasan serep ni roha. Jala lehon ma tu hami sude hatuaon

dohot hasonangan, hatigoran dohot hadameon.

102

S. Amen.

M. Antong sai tongtong ma didongani Tuhanta hita: Debata

Nasunhinagogo i ma mamasumasu hita: Ama dohot Anak (†)

dohot Tondi Porbadia.

S. Amen.

PAMASUMASUON NI PANGULA NI HURIA

(Isara 2)

PAMUNGKAAN

01. Ende

02. Hata Huhuasi

M. Di bagasan goar ni Ama dohot Anak dohot Tondi Porbadia.

S. Amen.

M. Hagogoon ni Tuhanta Jesus Kristus, holong ni roha ni

Debata, dohot parsaoran ni Tondi Porbadia ma mandongani

hamu saluhutna.


03. Hata Patujolo

M. Hamu angka dongan na hinaholongan di bagasan Tuhanta

Jesus Kristus. Saonari marpungu do hita dison asa tamulai

ruhut laho patotahon huhut pabangkit angka donganta na

gabe parhalado ni Hurianta on. Manang ise sian

103

tongatonganta, hamu sude angka dongan na hinaholongan, na

hujou hami goarna anon, manigor ro ma nasida tu jolo ni

langgatan on, asa dijalo nasida tohonannasida be, i ma na

gabe pangula ni Hurianta on, i ma:

Amanta ………………..

Marsinggang ma hamu …………….

Hamu sude angka dongan na marsinggang saonari di jolo ni

langgatan on, na sinaksihon sude ruas na ias, tulus na bulus

jaloonmuna tohonamuna be ba naeng ampehononnami tu

hamu.

Hamu amang …………… na rade do hamu mardongan roha

na ias, tulus jala na bulus mangulahon tohonan siampehonhu

tu hamu, i ma na gabe ……………….. di Hurianta on,

saleleng di anggapmuna, i ma saleleng ni ………. taon?

C. Na rade do ahu.

M. Ma rade do hamu di bagasan tohonan i saurdot jala satahi

saoloan rap mangulahonsa rap dohot angka donganmuna

pangurus?

C. Na rade do ahu.

M. Na olo do hamu marjanji huhut marpadan saleleng di

tohonanmuna i, na so jadi hamu mardingkan manang tu ise

104

pe, ala ni parmargaon, ala ni partondongon, manang ala ni

aha pe angka na asing i, angka na suman tusi?

C. Na olo do ahu marjanji huhut marpadan.

M. Na olo do ahu marjanji huhut marpadan, ia tohonan na naeng

ampehononhon tu hamu, ndada na mangalului hamoraon

manang hasangapon portibi di hamu sandiri, jala na so jadi

hamu mangagohon arta ni Huria i?

C. Na olo do ahu marjanji huhut marpadan.

M. Hamu sude angka dongan na pungu nuaeng dison, nunga rap

umbegesa hita di janji dohot padan ni (angka) pangurusta.

Ala ni rap ma hita saonari mangidohon tu Debata, anggiat

dipargogoi jala dipasupasu Debata ibana (nasida) laho

mangulahon tohonan na uli na pinasahat tu ibana (nasida).


(huhut manurdukhon tangan)

Ale Tuhan, Debatanami jala Amanami Nasunhinagogo,

Sitompa langit dohot tano dohot nasa isina, marpungu do

hami nuaeng di jolom laho manaringoti poda na sian Ho

dohot tiruan na denggan na binahen ni Anakmu Jesus Kristus,

Tuhannami. Mardongan roha na serep hupangido hami ma tu

Ho, sai usehon ma pasumpasum (†) tu (angka) pangurusnami

on. Sai asi ma roham mida (angka) pangurus ni Huriamon,

105

asa margogo jala marbenget ni roha nasida mangulahon

tohonanna be naung pinasahatmi tu ibana (nasida). Ungkap

ma rohana (nasida) asa olo unduk, saurdot jala satahi saoloan

rap dohot donganna (nasida) pangurus, rap marhobas di

tongatonga ni ruasmu, mangalului jala mangeahi angka na uli

di bagasan roha holong na sian Ho i jala tutu

masihaholongan. Marhite Kristus Tuhannami.

S. Amen.

M. (Mamispis pangula ni Huria i dohot aek na badia. Pangurus na imbaru

jongjong mandopakhon ruas ni Huria i, dungi i marende ma huhut

manjalang. Tung mansai denggan do molo dohot ina pardijabu ni

pengurus i mandongani nasida be)

04. Ende

PANUTUP

05. Tangiang


Ale Debata Nasunhinagogo jala Parholong roha Nasumurung,

sai tatap ma mardongan asi ni roham dongannami on, na

mulai sadari on gabe ………. di Huriam on. Dibahen i,

hupangido hami ma tu Ho: sai lehon ma pasupasum dohot

pangurupionmu tu (angka) dongannami on, asa tolap ibana

(nasida) mangulahon tohonanna (nasida) i, mardongan

106

hapistaran dohot habisuhon laho mangurupi angka donganna

(nasida) huhut mardongan holong ni roha marhobas di

tongatonga ni ruas ni Huriami, songon Jesus Kristus na ro tu

portibi on ndang laho dihobasi alai laho manghobasi.

Ale Tuhan, Amanami Parholongroha Nasumurung, tangihon

ma janji dohot padan ni (angka) dongannami on, jala

pasupasu ma angka sangkap dohot tahi ni rohana (nasida)

laho pamajuhon Huriam dohot masyarakat na dison. Ai Ho

do na mangolu jala na mangarajai, sahat ro di saleleng ni

lelengna.

S. Amen.

107

rituale 11 baptis bayi bahasa toba

Documents