Nyadi penatai aku tu ari tebing ninding sangking keriring gong besi,Bejerekika ka badi lumpung bari,Beturuska gerabus bedil temagi,Jelatung renjung-renjung tampung titi,Numpu ke pun sibau bali.Bebungai niap malam, bebuah ninting hari.Enti malam bini ngambi mimpi,Pagi aku lalu dikangauka nerima bintang Setia Raja.

Aku tu datai ari tebing tanah renjan,Nama mimit nanga Terusan, bejerekika badi bedil meriam,Tebing ninding sangking keriring gong bulan,Jelatung renjung-renjung tampung jematan,Numpu ke pun pauh kemantan,Bebungai ninting pagi, bebuah niap malam,Ke nyeruran beguran di mua benda.

Nyadi pengawa ke bekunsika penemu tu endang suah ga udah dikereja tang meh ambi ke ngiring bala. Kebuah pia laban iya ke bendar kitai endang iya deka bekunsi penemu enggau pangan diri. Laban nadai kitai tau kediri-diri ngereja ni bengkah leman utai.

Nya alai, enti aku tak disema baka rekaya tuai, nyamai endar,Laban iya landik sereta pandai, nemu penatai leka jakuEnti aku tu tak baka biak, lantang endar enda besak,Laban iya nemu selepak jalai pengerindu.

Tang deh tudah aku tu baka kelabu empituSabung tumu muka kelang

Nya alai aku tu baka berangai panjai limaKada aku tu tan laban lelangan pangka benaKada enda tak belinggang kena segang alun panjaiKada aku tetemuka pengkalan

Entak taman alai sangkai. Taja pia ba pengujung kus tu aku arapka kitai semua nyau tau timang nunda puntang lemambang Baja,Renung kita tau nunda langkung aya Segaya,Ramban kita pan tau meh nunda pelian manang Pega,Pantun kita tau meh nunda tusun enggi ibu kitai Selaka.Ngeluluka kita tau meh ngena jaku chukup sempama,Kita ke ngeleka ke nya pan nyata, kami ke ninga pan gaga.